Sina Richard at Raymond Gutierrez ang katabi ni Kris Aquino na nanood ng Annebisyosa concert ni Anne Curtis. Naging close ang tatlo nang magbakasyon sa New York, pero bakit sa birthday ng kambal, si Raymond lang ang niregaluhan ng TV host-actress ng LED TV?

Hindi lang sina Richard at Raymond ang Kapuso na nanood ng concert ng Kapamilya talent, naroon din sina Solenn Heussaff, Tim Yap at Isabelle Daza. Kapuso rin ang director ng concert na si Rico Gutierrez.

Ano kaya ang reaction ni Solenn nang umapir na topless sa stage si Derek Ramsay? Curious din kami sa reaction ni Erwan Heussaff nang mag-duet ang mag-ex na sina Anne at Sam Milby.

Successful ang concert ni Anne, nangangamoy repeat, dedicated niya sa non-singers ang concert. Aliw dahil pati mali ni Anne ay pinalakpakan at may number pa siyang ipina-take two dahil nagkamali siya ng pasok. Hahaha!

Sina Kris at Anne ang magkasama sa bagong soap ng ABS-CBN na Kailangan Ko’y Ikaw na sabi’y si Robin Padilla ang leading man at si Joyce Bernal ang director.

* * *

Naging super close ang cast ng Munting Heredera, kaya malungkot ang lahat at may usapan silang magkita once a month para magkuwentuhan o mag-videoke.

Dahil sa Muher, na-rediscover ang ilan sa kanila, gaya ni Leandro Baldemor, hindi na lang daw siya bold star. Karamihan ay may next project na sa GMA-7.

Si Gabby Eigenmann nasa Broken Vow, sina Neil Ryan Sese at Barbara Miguel ay nasa Biritera. Ang iba’y magre-rest muna, gaya ni Gloria Romero, pero sabi ni Direk Maryo J. delos Reyes, sa March, may family drama uli sa GMA-7 ang aktres. 

Samantala sa Muher mamaya, sasabihin ni Michelle (Kylie Ocampo) kung saan nagtatago ang ama, pero ‘di ito susuko. Matatanggap na rin ni Simeon na hindi siya mamahalin ni Sandra (Camille Prats). Mababaril siya ng pulis.

* * *

’Katuwa ang kuwento ni Roseanne Mangan, ang batang introducing sa Biritera dahil akala’y singing contest ang audition na pinuntahan sa GMA-7, hindi nito alam na soap opera ang gagawin. Turning 10 years old sa February 22 ang bata at okey sa kanya na from Jinky, Roseanne na ang name niya sa showbis.

Umiyak si Roseanne nang kantahan ni Dennis Trillo dahil na-feel niya ang kanta. Kino-congratulate siya ng classmates niya sa Earist at ang kikitain niya sa Biritera ay ibibili ng gamit sa bahay nila, gamit ng anim na kapatid at mga gamit niya.

Naloka ang bagets sa biro ng press na bigyan sila ng kaldero na ginagawa ng ama sa pinapasukang factory. Sumasali na sa singing contest si Roseanne  kaya wala ng kabang bumirit.

* * *

Last week na rin ng Daldalita at sa episode mamaya, hindi pa rin magkikita ang mag-amang Mateo (Ogie Alcasid) at Daldalita (Jillian Ward). Dadalhin sa presinto                                                                                                                                                                                                         sina Daldalita dahil napagkamalang magnanakaw si Tanzan (Raymart Santiago) ng kapitbahay na umakyat ng bakod para maghanap ng tubig.

Nasa police station din sina Sam (Marc Abaya) at Katrina (Manilyn Reynes) para i-report ang pagkawala ni Marga (Julie Ann San Jose). Hahatakin ng una ang huli palabas ng presinto para hindi makita si Daldalita. Hindi rin papayag si Cherry (Rufa Mae Quinto) na malaman ni Mateo na buhay pa ang anak, itatapon nito sa aquarium ang celfone ni Mateo bago pa matawagan ni Katrina. 

* * *

Sa Kokak, hindi matanggap ni Carl (TJ Trinidad) na anak si Kara (Sarah Lahbati) ng taong naging dahilan nang pagpapakamatay ng ate niyang si Vicky, kaya iiwan niya ang nobya. Hindi nito pakikinggan ang pakiusap ng dalaga na ’wag idamay ang relasyon nila.

Nagselos na naman si Norman (Gian Magdangal) kay Renato (Gary Estrada) at sasaktan uli nito si Angela (Jessa Zaragoza). Dumating si Kara at sinabing ang parents ang sinisisi nina Carl sa pagkamatay ng ate niya. Hindi papayag ang ina ng BF na magkatuluyan silang dalawa.