NAGING tampulan ng biruan ang guwapong hunk actor na si Dennis Trillo sa presscon ng pinaka-latest na teleseryeng aabangan gabi-gabi sa Primetime Telebabad ng GMA7 na Biritera, ang kapalit ng no. 1 soap na Munting Heredera.

Masasabing kakaibang character ang ginagampanan ni Dennis sa Biritera na magsisimula nang mapanood sa Kapuso Network simula Feb. 6.

Bilang vocalist-lyricist si Dennis ng kanyang bandang The Bridge at nagtagumpay sa larangan ng musika, malamang si Glaiza de Castro ang magiging dahilan ng hiwalayan at selosan nila ng dyowang si Bianca King.

O, ’di nga ba naman kasi halos lahat yata ng naging leading ladies ni Dennis sa projects niya sa GMA7, naging dyowa niya tulad nina Cristine Reyes na lumipat sa ABS-CBN, Jennylyn Mercado at Bianca King.

Ngayon naman, si Glaiza na loveless at matagal ng walang karelasyon.

Pabiro rin namang sinagot ni Dennis ang biro sa kanya sa pagsasabing ang GMA7 daw kasi ang nagbibigay sa kanya ng leading ladies na palaban kaya napapalaban din siya.

Kabig pa ni Dennis, wala naman daw siyang nakikitang dahilan para mag-away o pagselosan ni Bianca si Glaiza. Una raw, trabaho lang naman daw ito at tulad ni Dennis, ipinapareha din naman sa iba si Bianca.

Pagdating daw sa propesyon nila ni Bianca, walang pakialaman ang dalawa.

At lalung-lalo daw na walang dapat na ipagselos ang isa’t isa, kahit pa may love scene sila sa ibang artista.

* * *

Speaking of Direk Maryo J. delos Reyes, proud na proud ang magaling na director sa latest project niya sa Kapuso na Biritera, lalo pa at malaki rin ang naging partisipasyon ni Direk Maryo sa pagpili ng bagong child star na pasisikatin ng GMA7.

Nagpa-audition at talagang sinala na mabuti ang magiging biritera.

Isa rin si Direk Maryo sa nakapansin sa galing sa pagkanta at pag-arte ng napili nilang si Roseanne Magan.

Ayon pa kay Direk Maryo, very cooperative raw ang bata at napakada-ling matuto sa mga pinapagawa sa kanya.

Sa tsika naman na malaki raw ang tension sa Biritera dahil naging no. 1 soap ang papalitan nito na Munting Heredera, mariing sinabi ni Direk na para sa kanya, walang pressure.

Ang success para kay Direk Maryo ay spontaneous. Kung para raw talaga sa isang project ’yun na maging successful, sadyang nakalaan na raw ito.

Mas magpo-focus daw si Direk na pagandahin ang kanyang bagong project kaysa tumutok sa rating nito.

Agree kami sa ’yo, Direk Maryo!