Pinalitan ang pangalan ni Glaiza de Castro sa Biritera from Irish to Mikaela, ang drummer sa The Bridge Band, co-band member ni Andrei (Dennis Trillo) na magkakagusto rito. Comfortable ang aktres sa tema ng bago niyang soap sa GMA-7  dahil music lover siya at marunong maggitara at mag-drum, pero kinailangan pa rin niyang mag-drum lesson para mas gumaling pa siya.

First time magkasama sina Glaiza at Dennis at tinanong ang dalaga kung posible silang magka-inlaban ng actor dahil kilala itong nai-in-love sa kapareha. Hindi ba’t sa relasyon natuloy ang team-up nila ni Bianca King sa Sinner or Saint?

“Ngayon pa lang kami nagkasama at ’di natin alam ang mangyayari. Pero masaya siyang katrabaho at magaang kaeksena at magaling. ’Pag umaarte siya, hindi na siya si Dennis, ang karakter na niya. Ayaw ko munang ma-in-love,” sagot nito.

Sa February 6, after 24 Oras, ang pilot ng family drama sa direction ni Maryo J. delos Reyes. Sabi ni Direk Maryo, order sa kanya to produce a good show at kundi man niya mahigitan ang popularidad ng Munting Heredera, sana mapantayan niya at in-assure nito ang viewers ng isang magandang family drama.

* * *

Malapit nang magtapos ang Kokak at kahit mother ni Sarah Lahbati ang role ni Jessa, malakas pa rin ang appeal sa kalalakihan. Tsika ni Direk Ricky Davao, ’pag eksena nito, nakatanghod ang crew. For her next project, gusto ni Jessa ng comedy at sana raw ay primetime.         Paging GMA-7!

Tamang matatapos ang Kokak sa release ng new album ni Jessa under GMA Records entitled ’Pag Wala Na ang Ulan dahil maaasikaso niya ang promo nito.         Proud siya sa five-track album na ang carrier single at title-track ay theme song ng Ikaw Lang ang Mamahalin. May duet din sila ni Kris Lawrence, ang Napatawad Na Kita, at potential hits din ang iba pang tracks.

Isi-celebrate nina Jessa at Dingdong Avanzado ang 10th anniversary nila sa March 18, at aalis sila  para sa States mag-celebrate kasama ang anak nilang si Jayda.

* * *

Sayang at wala si Diego Loyzaga sa presscon ng Hitman, titingnan sana namin kung mas straight na siyang mag-Tagalog sa last time namin siyang ma-interview sa shooting ng movie.

Na-impress ang press sa bagets dahil after ilang weeks, matatas nang mag-Tagalog at sabi nito, hindi siya lumabas ng bahay hangga’t hindi siya natuto ng Tagalog.

Tatanungin din sana namin si Diego kung anong type niyang gamiting apelyedo dahil si Cesar Montano, gusto’y Montano ang kanyang gamitin sa pelikula at Loyzaga sa TV, pero baka malito ang fans at isiping dalawang tao ito.

Anyway, dapat ang role ni Mark Herras ang gagampanan ni Diego, pero naisip ni Cesar na hindi pa ito ready sa ganu’n kabigat na papel, kaya ibang role ang ibinigay na nakaya naman ni Diego.

Showing na sa February 22 ang Hitman, huhusgahan na kung puwedeng sumabak sa pelikula si Diego. Produced ito ng CM Productions and distributed by Viva Films.

Si  Cesar din ang director at sumulat ng script at pati musical score at editing ay tinutukan para mas mapaganda ang pelikula.

* * *

Lalabas na mamaya ang guesting ni Claudine Barretto sa Tweenhearts bilang si Clarice Benitez, sikat na TV host na mag-i-interview kay Heidi (Kylie Padilla) na sikat na modelo.

Kasama sa itatanong ni Clarize kay Heidi ang panliligaw ni Rick (Derrick Monasterio) kay Bel (Bea Binene) na ikinagulat nito dahil hindi alam na nagkaligawan ang dalawa. Ayaw pakinggan ni Heidi ang paliwanag ng dalawa.

Feeling ni Josh (Joshua Dionisio), trinaydor siya ni Kevin (Kiko Estrada) nang mapanood ang video confession nito na may pagtingin siya kay Bambi (Barbie Forteza), iba sa sinabi nitong friend lang ang turing sa kinakapatid. Pero  mapapanood ng buo ni Josh ang video at malalaman nitong may taning na ang buhay ni Kevin.

Babaguhin ni Aya (Joyce Ching) ang looks niya para mapansin ni Chris (Kristoffer Martin), pero hindi ito magugustuhan ng huli at lalo pang lalayo. Nabastos si Aya dahil sa ikli ng suot, ipinagtanggol siya ni Chris, pero pinagsabihan na ikinaiyak nito.

Nag-sorry si Chris kay Aya at pinayuhang hindi niya kailangang baguhin ang sarili dahil ugali niya ang kanyang nagustuhan at ‘di ang panlabas na anyo.

* * *

May tsikang hindi na magre-renew ng kontrata ang sikat na movie-TV personality ‘pag nag-expire ang kontratang pinirmahan sa nilipatang network dahil hindi raw masaya sa kinalabasan ng show sa sa network.

Nauna nang nabalitang hindi na matutuloy ang isa pang big project ni MTVP (movie-TV personality) sa nilipatang network dahil hindi na babalik ang big star na makakasama sana niya. Sabi, hindi na ibabalik ng kanyang manager sa network ang big star dahil sa komplikadong rason.