ISANG malapit na kaibigan ni Vic Sotto ang nakakuwentuhan namin at tahasan niyang sinabi na kung siya ang personal na tatanungin kung boto siya sa relasyong Vic-Pauleen Luna, ang isasagot daw niya ay super-boto siya. 

Ayon na rin sa malapit na kaibigang ito ni Bossing Vic, dapat daw, magpasalamat ang mga anak ni Vic  dahil si Pauleen ang minahal ng kanilang ama, kesa sa ibang batang aktres diyan o sa babaeng ka-edad ng kanyang ama na may masama namang ugali.  Si Pauleen daw, sobrang bait, napakalambing at napakamaunawain. At sana raw, maisip ng mga anak ni Vic na hindi na bagito ang kanilang ama sa larangan ng pag-ibig, dahil wala silang alam na bago diniskartehan ni Vic si Pauleen, “sinuri” muna nito nang husto ang dalaga.

“Napakabait kasi ni Pauleen. May malaking puso lalo na sa mahihirap. ‘Yang si Pauleen, lagi ’yang may mga dala-dalang kung anu-anong pagkain at sitsirya sa likod ng kanyang kotse. Alam n'yo ba na ipinamimigay ang mga ’yun ni Pauleen sa mga street children na kanyang nadaraanan sa kalsada? Ugali na 'yan ni Pauleen noong araw pa.

“‘Yun ang isa sa mga dahilan kung bakit nahulog ang loob ni Vic kay Pauleen. Hindi materyosang babae si Pauleen. Maaaring minahal siya ni Vic hindi dahil sa pera nito, kundi dahil halos pareho sila ng ugali na makamahirap,” depensa pa ng kaibigan ni Bossing Vic.

*  *  *

SIKAT NA LEAD VOCALIST NG BANDANG SURVIVOR MAY CONCERT SA COWBOY GRILL

Magkakaroon ng concert sa ating bansa si Jimi Jamison ng bandang Survivor na nagpasikat sa soundtrack na Eye of the Tiger ng pelikulang Rocky na kinanta niya mismo sa mga laban ni Manny Pacquiao.   

Ang live concert series na ito na pinamagatang LOVE ROCKS! ay gaganapin sa Cowboy Grill-Quezon Avenue sa Feb. 11 at sa Cowboy Grill-Mabini sa Feb. 15.

Ang ilan pa sa mga awitin ni Jimi Jamison na certifiable billboard hits ay ang The Search is Over, Eversince the World Began, High on You, Burning Heart,  at I’m Always Here, na theme song ng TV show na  Baywatch.

Mabibili ang mga tiket sa Cowboy Grill at sa lahat SM Ticket outlets o tumawag sa 470-2222.

*  *  *

SPEAKING of Kadamay Oramismo Foundation ng batikang broadcaster at CMMA awardee Gani Oro ng GMA7-DZBB, talaga namang kahanga-hanga siya sa kanyang napakagandang adhikain para sa mga kabataang mahihirap.    

Advocacy kasi ni Gani na makapagpatuloy ng kani-lang pag-aaral ang mga kaba-taang mahihirap. Ang ginagawa ni Kuya Gani, perso-nal niyang binibigyan ng mga baon o allowance na cash ang mga batang mahihirap.

Sabi nga, si Kuya Gani Oro, ang tunay na Mr.Public Service, ay talagang uma-aksyon at hindi nagpapa-pogi lang.

Napapakinggan ang prog-ramang Oromismo araw-araw, 12 ng tanghali hanggang 2 ng hapon, sa GMA7-DZBB.

*  *  *

ZOREN LEGASPI, CARMINA AT MGA ANAK NASA INFOMERCIAL NG MTRCB

INSPIRASYON nga sa lahat ng mga manonood ang buo at masayang pamilya ng mag-asawang Zoren Legaspi at Carmina Villarroel.

Sa totoo lang, bukod-ta-ngi kasing ang pamilya nila ang masasabing walang anumang intriga.

Sabi nga, larawan ng masayang pamilyang nagmamahalan, nagbibigayan, naggagalangan ang pamilya nina Zoren at Carmina.

Kuwento ni Zoren, ngayong ay may may shooting ulit sila para sa panibagong TV commercial.

“Bagong Infomercial ito ng MTRCB,”  tsika sa amin ni Zoren.