MALAKI talaga ang pagkakahawig ni Julia Montes kay Shirley Fuentes kahit saang anggulo sipatin. Ito ang unang impresyon namin nang maimbitahan kami sa presscon ng launching movie nila noon ni Kathryn Bernardo na Way Back Home.

Eh, nagra-rhyme pa ang pareho nilang apelyido (Montes-Fuentes) kaya mas madaling tandaan ang pagkakahawig nila.

Para sa amin nga lang, ’di hamak na mas maganda si Shirley kesa kay Julia, huh! Mas maamo pa ang mukha ng dating That’s Entertainment alumnus na napapanood pa rin ngayon sa Walang Tulugan ni Kuya Germs.

Unlike Julia, ’di hamak ding mas seksi si Shirley nu’ng kabataan niya kaya naman madali siyang nagustuhan ni Romano Vasquez.

Eh, in fairness, sumikat naman si Shirley nu’ng kapanahunan niya kaya huwag ma-offend si Julia kung ikumpara siya  rito. 

Mabuti nga at may ABS-CBN na humahawak sa career ni Julia ngayon hindi gaya noon na sa movies mas namayagpag si Shirley, mga baratilyo (tawag sa tiangge), fiesta at iba’t ibang klase ng pagkakakitaan.

Sa malaking magkakahawig nina Shirley at Julia, hindi kami magtataka kung intrigahin silang mag-ina, huh!

* * *

WALANG chance maglamiyerda si Direk Joel Lamangan at ang mga kasama niya nang magsyuting sila ng indie movie na Migrante sa Israel nitong unang bahagi ng January.        

Bukod sa nangangatog ang baba at tuhod nila sa lamig, isinaalang-alang nila ang kabanalan ng lugar na pinagsyutingan nila roon.

“Naku, baka any moment, ’yung puntahan naming lugar, doon dumaan si Jesus at iba pang mga taong holy!

“Nakapunta rin kami sa Garden of Gethsemane at nandoon pa ’yung batong pinagdasalan ni Jesus. Pero guwapo ang mga Israelite! Hahaha!” kuwento ni Direk Joel nang makasama namin sa salubong ng Chinese New Year sa Imperial Palace Suites na ipinag-imbita ni Mother Lily Monteverde.

Gusto sanang pumunta ni Direk sa Tel Aviv pero tatlong oras daw ang biyahe mula sa lugar na tinirhan nila.

“Kaya lang, baka magalit ang producer namin kapag tumakas kami dahil baka wala kaming makunan. So, puro trabaho ang ginawa namin sa Israel kasama sina Jodi Santamaria, Allen Dizon at iba pa,” balita pa niya.

Balik-taping na ng Valiente si Direk Joel, project niya ngayon sa TV5.

Dahil lost ang byuti nila sa Israel, mas gustong balikan ng director ang isang bansa sa Middle East dahil sa hinding-hindi niya makakalimutang karanasang bumuhay sa kanyang dugo.

* * *

UMANI ng papuri ang Japanese actor na si Jacky Woo nang dumalo siya sa Korean Film Forum press conference last December dahil sa pelikulang ginagawa na 20 Years na pinagbibidahan niya. 

Ininterbyu siya ng Yonhap News Agency at Yahoo Press tungkol sa movie na istorya ng isang Korean national na nakatira sa Japan at nakulong doon ng 20 years sa bintang na pagpatay sa ama.

Nang makalaya, bumalik ang tao sa Korea, umibig sa babae pero naging masalimuot pa rin ang buhay kaya dito pumasok ang hitik na action scenes kung saan muling ipinamalas ng actor na Hapon ang galing sa martial arts.

Bukod sa drama, tadtad din ng pasabog na maaaksyong tagpo ang pelikula na dinirek ng sikat na si Bae Tae Su.

No wonder, missing in action si Jacky sa bansa dahil may pelikula na namang ginagawa bukod sa iba pang negosyo sa Japan.

Marami na nga ang nakaka-miss sa kakengkuyan ng actor na napapanood sa Bubble Gang at ibang shows sa GMA na madalas niyang labasan, huh!