Bago mag-Valentine’s Day ang Christian dedication ni Baby Nathaniel James.

Nabanggit ni Ogie Alcasid na sina Gary Valenciano, Piolo Pascual at ang husband ni Michelle van Eimeren ang tatlo sa ninong at isa naman sa ninang ang kapatid ni Regine.

Anyway, last taping day nina Ogie ng Daldalita sa January 28, nalulungkot na ito at tinanong si Jillian Ward kung mami-miss siya. 

Naging close siya sa bagets at sa ibang cast lalo’t aabot ng 16 weeks ang airing nito.

Dahil sa tawag ni Jillian sa kanyang Tatay Mateo sa Daldalita, gusto ni Ogie na tatay ang itawag sa kanya ni Baby Nate.

Ang ganda raw pakinggan ng tatay, kesa papa o daddy.

After Daldalita, movies muna ang focus ni Ogie.

“Focus muna ako sa movies, gagawin ko ang Boy Pick-Up  at musical movie na Do Bi Do Bi Doo. Nag-recording na sina Gary, Sam Concepcion at Zsa Zsa Padilla for DBDBD at kasama rin si Eugene Domingo.

“Sa Boy Pick-Up, gusto ko si Dennis Trillo ang main villain, gusto ko rin makuha si Pepe Smith as my master at gusto kong i-guest si Gloc9. Kasama rin si Michael V at ang barkada ng Bubble Gang.”

Co-production ng GMA Films at Regal ang Boy Pick-Up to be directed by Dominic Zapata at produced ng Unitel ang DBDBD. Target playdate nila for Boy Pick-Up ay Black Saturday at June naman ang DBDBD.

Naghahanda na rin si Ogie sa Valentine concert nila ni Regine na Mr. & Mrs. A sa Smart Araneta Coliseum sa February 14.

Mag-i-enjoy daw ang audience sa inihanda nilang repertoire ni Regine.

* * *

“May matitigok sa main characters ng Kung Aagawin Mo ang Langit,” sabi ni Michelle Madrigal, pero hindi sinabi kung sino.

Hintayin na lang daw dahil malapit nang magtapos ang soap kung saan isa siya sa mga bida.

Kahit kontabida ang role, happy si Michelle dahil kahit galit ang viewers, gusto pa rin siya ng mga ito. Big compliment sa kanyang tawaging Brigette, name niya sa Kamal.

One of the most challenging roles ang ginagampanan niya rito, kaya thankful sa GMA-7. Hirap lang siya dahil madalas umiiyak sa kanyang mga eksena.

Wala pang next project si Michelle at habang naghihintay, okey sa kanyang mag-guest muna at okey din sa kanya kung maging character actress siya.

Ang importante, maganda ang project at role niya.

Samantala, inamin ni Michelle that she’s dating a Spanish-American football player, pero hindi sinabi ang name at i-Google na lang daw namin.

* * *

Hindi nahirapan ang Archangel Media na kumbinsihin si Michael de Mesa na tanggapin ang Valiente dahil nang malamang ire-remake ang teleseryeng very close to his heart at pinagsamahan nila ni Tirso Cruz III, gusto niyang maging part nito.

Sabi ni Michael, hindi siya mapakali nang dumating ang offer, nagpaalam siya sa boss niya na pumayag mag-leave siya sa trabaho niya sa Orange County, California.         Ang maganda, may babalikan pa siyang trabaho after his taping here.

Isa pang rason kung bakit tinanggap ni Michael ang Valiente ay dahil gustong makita ang apo kay Ryan Eigenmann na sa Skype lang niya nakikita.

“Gustung-gusto kong makita si Catalina and the first time I saw her face to face, I cried for 30 minutes,” kuwento ni Michael.

Sa February 13 ang pilot ng Valiente sa TV5 sa direction ni Joel Lamangan. Bukod kina Michael at Mark Gil, mapapanood din ang tambalan nina Michael at Gina Alajar at Mark at Jaclyn Jose at may Cherry Pie Picache pa.

* * *

Most-hated villain sa Munting Heredera si Gabby Eigenmann, kaya natuwa ang viewers sa nangyari sa karakter niyang si Desmond na nasunog ang buong katawan, pero buhay at nasa ospital.

Alam ng aktor na matutuwa ang tao na magsa-suffer pa siya bago mamatay dahil sa kasamaang pinaggagawa niya sa Montereal family.

Inaabangan din ng viewers ng Muher ang ending ng karakter na Simeon ni Neil Ryan Sese.

Gusto nilang mahirapan din ito bago patayin dahil sa pinaggagawa kina Sarah (Camille Prats), Jennifer (Mona Louise Rey) at Jacob (Mark Fernandez).

’Katuwa dahil sabi ni Gabby, naging close friends sila ni Neil Ryan at okey sa kanyang muli ito makasama sa future soaps.

Sa Broken Vow next na mapapanood si Gabby bilang konsehal at kapareha si Bianca King.