Binigyan ng napakagandang welcome si Carmina Villarroel last Sunday sa The Buzz para sa kanyang pagbabalik-Kapamilya na talaga namang ikina-touch ng aktres.

Mahaba at malaman ang naging panayam kay Carmina.  At first, si Boy Abunda lang ang nag-i-interview sa kanya pero tila may part 2 pa at dito ay ka-join na rin ang dalawa pang co-host na sina Toni Gonzaga at Charlene Gonzales.

Ang nakakatuwa, sa tinagal-tagal ng panahon, first time lang nagsalita si Carmina tungkol sa ilang detalye ng pinagdaanan nila ng dating asawang si Rustom Padilla na as we all know ay BB Gandanghari na ngayon.

Matatandaang not even once, as in never talaga, nating narinig magsalita si Mina tungkol sa dating asawa kahit noong time na kasagsagan ng pag-amin ni BB na gay siya.

Ang daming interesadong kunin ang pahayag niya, pero talagang hindi napilit si Carmina na magsalita.

Last Sunday, sa The Buzz lang niya nasabi finally at na-reveal na bago pa man nag-out si BB, alam na raw niya ang lahat dahil sinabi raw ng ex-husband niya.

“Naku, BB, 'wag ka nang magagalit. Hayaan mo na, tapos na ’yun,” tila pagpapaliwanag ni Carmina kay Rustom sa ere.

"Nakipag-coordinate siya kay Candy (Pangilinan),” kuwento ni Mina tungkol sa kung paano sinabi sa kanya ni BB ang lahat.

“Sabi nga niya, gusto niya kaming magkausap. So, ako naman, ‘sige, usap tayo.'

“Tapos, kuwentuhan lang. Nakakatuwa kasi para kaming friends. 'Yung tawa lang kami nang tawa. Kinda weird, pero maybe because wala nang galit sa puso ko. Happy na ako sa buhay ko. Parang right timing lang talaga.

"Tapos ’yun, may mga bagay-bagay na sinabi siya sa akin. Sinabi na yata niya sa PBB. So, kung ang lahat ng tao nagulantang sa sinabi niya, ako, hindi na. Kasi, sinabi niya sa akin."

Nasa Kapamilya na si Carmina ulit at dalawang taon ang kontratang kanyang pinirmahan. Nakatakda siyang magkaroon ng bagong show with Janice de Belen, isang teleserye at isang pelikula sa Star Cinema.

Pero kung kami ang tatanungin, parang bagay din kay Carmina ang mapasama sa The Buzz bilang co-host yaman din lamang at wala na si KC Concepcion.

* * *

Malalantad na ang tunay na kinaroroonan ng nawawalang anak nina Maria (Erich Gonzales) at Luis (Enchong Dee) sa Primetime Bida teleseryeng  Maria la del Barrio.

Matapos malaman ni Sabrina (Jewel Mische) ang katotohanan tungkol sa itinuturing niyang anak, magawa kaya niyang ibalik ang bata sa karibal niyang si Maria?

O makikipagtulungan siya kay Victoria (Angel Aquino) upang itago ito at tuluyang wasakin ang pag-asa na mabuo ang pamilya ni Maria?

Abangan ang mga kaganapan gabi-gabi sa Maria la del Barrio sa ABS-CBN.

* * *

No comment pa rin si Matteo Guidicelli tungkol sa nababalitang pagsasara ng Happy Yipee Yehey. Muli namin siyang tinanong last Saturday sa show nila ni Ai-Ai de las Alas at Derek Ramsay sa Zirkoh at wala pa rin siyang naisagot.

Aniya, wala raw siya sa posisyon para magsalita at kung meron mang announcement, ito ay manggagaling sa management, not from him.

Sa halip, inanyayahan na lang niya kaming manood ng movie nila ni Maja Salvador with Xian Lim, My Cactus Heart na, incidentally, ay showing na nationwide ngayong araw, January 25.