NABULABOG ang mga taong nasa airport kamakailan nang biglang bumulaga sa Ninoy Aquino International Airport  ang Hollywood actor at ang bagong James Bond Agent 007 na si Daniel Craig. Dinalaw ng sikat na aktor ang misis niyang si Rachel Weisz na ilang araw na rin niyang hindi nakakasama dahil nagsu-shoot dito para sa pelikulang Bourne Legacy.

Tahimik ang pagdating sa bansa ni Daniel at para hindi na magkagulo pa sa airport, hindi na lang ito nagpa-interview sa ilang mga reporter na naroroon.

Dumating na rin pala sa bansa ang bida ng Bourne Legacy na si Edward Norton.

* * *

NAG-TRENDING sa social networking ang wedding nina Valenzuela Councilor Shalani Soledad at Congressman Roman Romulo na ginanap last January 22 sa St. Benedict’s Church, Ayala Westgrove, Sta. Rosa, Laguna.

Lalung-lalo na raw sa si-nabi ng political couple sa kanilang wedding vows: “You are my home. You are my happiness,” say ni Shalani at “I waited 44 years before God gave me this favor,” sa parte naman ni Rep. Roman.

May kilig factor ang buong pamilya Soledad at Romulo, maging ang mga sumaksi sa kasal ng dalawa habang pumapasok na sa simbahan ang bride at sinasaliwan ng awitin ni Bruno Mars na Just The Way You Are in a slow version.

Ang awiting ding ito ang ginamit noon ni Willie Revillame nang ipakilala niya si Shalani bilang lady co-host sa programa niyang Wil-ling Willie, kaya naman pinasasalamatan ng mother ni Shalani na si Evelyn Soledad-Yumol si Willie sa pagtanggap sa kanyang anak bilang host, kahit alam niyang wala pa itong experience sa pagho-host, na napag-aaralan na raw ng kanyang anak habang tumatagal.

Ilang araw ding hindi mapapanood si Shalani sa Wil Time Big Time dahil magha-honeymoon muna sila ni Rep. Roman.   

Happy naman si Willie sa bagong buhay na tinatahak ngayon ni Shalani at natagpuan na raw nito ang lalaking tunay na makakapagpaligaya sa kaibigan.

Teka, birthday ni Willie sa Friday, January 27, dumating kaya si Shalani para bumati sa TV host?

* * *

HOW true na hindi lang pala ang Happy Yipee Yehey ang mawawala sa ere sa Pebrero, kundi pati ang Saturday showbiz talk show din na E-Live, hosted by Luis Manzano, Bianca Gonzales, Nikki Gil at Ogie Diaz.

Four years na sa ere ang Saturday talkshow at wala pang idea ang aming source kung ano ang ipapalit sa slot na maiiwan nito.

Say naman ng hosts ng show, wala pa raw silang alam hinggil sa isyung titigbakin na ang kanilang programa.

* * *

SI Bugoy Cariño ngayon ang binigyan ng break ng Kapamilya Network para sa fantaseryeng E-Boy na mapapanood sa January 30.

Showbiz na showbiz din kung sumagot ang Best Child Performer sa nakaraang Metro Manila Film Festival. Ang E-Boy ay tungkol sa isang batang robot na bi-nigyan ng mga katangian ng isang tao na nang lumaon, nagtulak sa kanyang hanga-ring maging isang tunay na bata, sa katauhan ni Bugoy.

Makakasama ni Bugoy sina Ariel Rivera, Jomari Yllana, Agot Isidro, Valerie Concepcion, Jaime Fabregas, Chinggoy Alonzo at Pen Medina. Kasama rin ang mga bagets na sina Maliksi Morales at Blythe Gorostiza.

* * *

VERY open na si Sarah Geronimo tungkol sa kanyang lovelife.

Wala mang pag-amin na may namumuong relasyon sa kanila ni Gerald Anderson, inamin ng singer-actress na masaya siya kapag nakakausap at nakakasama ang Fil-Am actor.

Katunayan, hindi itinago ni Sarah sa press na niregaluhan siya ni Gerald ng Tiffany necklace last Christmas. In turn, binigyan niya ng t-shirt si Gerald na si Mommy Divine pa raw mismo ang pumili.

Happy din daw si Sarah dahil magkakaroon na siya sariling show na mapapanood every Sunday night sa ABS-CBN. Isa itong musical na kapalit ng Gandang Gabi Vice ni Vice Ganda, entitled Sarah G Live. Dahil sa show na ito, hindi muna mapapanood si Sarah sa ASAP.