Sa Feb. 21 na ang start ng taping ni Kris Aquino for her new teleserye sa ABS-CBN, ang Kailangan Ko’y Ikaw with Anne Curtis. Naghahanda na ang Queen of All Media for this and in fact, todo-todo ang pagpapayat niya ngayon.

“Na-challenge talaga ako ni Deo (Endrinal, her manager at siya ring business unit head sa gagawin niyang serye). Sinabi niya na pag nag-roll tayo ng Feb. 21, kung gaano ka-fit si Anne Curtis at kung gaano ka-fit ’yung leading man mo, ganu’n ka din ha? So, sabi ko, okey,” sey niya nang makausap namin siya last Thursday night sa thanksgiving dinner ng Segunda Mano.

’Yun nga lang, hindi pa raw talaga pwedeng i-reveal kung sino ang magiging leading man at papagalitan daw siya ni Deo. Pero pasabog talaga kung sino ito kaya abangan.

Anyway, payat na nga si Kristeta dahil she really makes it a point na makapag-exercise araw-araw. Madalas ay sa gabi siya nagwo-work-out sa bahay niya. Mayroon siyang treadmill, elliptical trainer at recumbent bike na pinaghahalinhinan daw niya para hindi siya ma-bore.

Bukod dito, during her stay in New York last December, wala raw siyang ginawa kungdi maglakad nang maglakad kaya nakatulong din ito para mag-slim down siya.

Dahil sa teleserye niyang ito, naisakrpisyo ni Kris ang Deal or No Deal na tinanggihan na niyang i-host. Inanunsyo na niya few days ago sa Kris TV na si Luis Manzano na ang papalit sa kanya bilang host.

Ang dahilan?

“Gusto ko talagang maging aktres,” sambit niya sabay tawa. “Ibigay n’yo na.”

Na-touch daw nga siya kay Batangas Governor Vilma Santos dahil tumawag pa talaga sa kanya para i-discuss ang tungkol sa Deal or No Deal.

“Ang sweet-sweet ni Ate Vi because she texted me also about it to ask, sabi niya, ayaw niyang magkaroon ng bad blood or anything. Sabi ko, ‘Ate Vi, talagang ano, the option was given to me in 2010, and in 2011 ulit, and then, before they (management) talked to Luis, tinanong nila ako ulit and then I said talaga na ‘I feel I’ve done everything I could doon and it would give the brand something fresh kung iba ’yung host’,” the Queen of All Media said.

* * *

Dahil nag-click ang loveteam nina Empress at Ejay Falcon sa Guns & Roses, binigyan sila ng Star TV of ABS-CBN ng sariling teleserye, ang Mundo Man ay Magunaw na magsisimula na sa Jan. 30 sa Kapamilya Gold (afternoon timeslot).

Sa presscon ng nasabing serye ay ipinahayag ng dalawang bida kung gaano sila kasaya at ka-thankful na pinagkatiwalaan sila ng sariling soap ng network.

Pero kasabay nito, siyempre ay kinukulit sila kung may nade-develop na ba sa pagitan nila since matagal-tagal na rin silang magka-loveteam.

“Basta kami okey kami sa isa’t isa. Masaya kami pag magkakasama kami lagi.  Kaya hindi imposible na  mangyari yun,” pahayag ni Ejay.

Sey naman ni Empress, “Tulad ng laging sinasagot namin nu’ng Guns and Roses bago pa man kami maging loveteam ay  magkaibigan  na po kami. Talagang lumalabas na po kami ng mga kaibigan namin. Tapos nalaman na lang namin na maging love team kami. Kaya masaya kami, at least parang together forever na ito -- ’yung love team namin kaya okey na okey, ’di ba?”

How true na kinausap si Ejay ng mommy ni Empress para huwag ligawan ang leading lady?

“Hindi po. Wala namang ganoon.  Basta si Empress lang po ang babaeng pinakamalapit sa akin ngayon. Kumbaga, siya po ’yung lagi kong kasama, nasasabihan ko rin ng mga sikreto ko sa buhay, e, ’yung mga sikreto ko alam niya.

“Pero sa ngayon, wala pa naman ’yung... hindi pa kami dumadating sa point na nanliligaw ako sa kanya. Wala pa pong ganoon. Basta, masaya po kami kung anuman ’yung meron kami ngayon. ’Yung pagiging magkaibigan namin, nagtutulungan sa trabaho namin,” sey ni Ejay.

Samantala, kasama nina Empress at Ejay  sa serye sina Nikki Gil, Sylvia Sanchez, Allan Paule, Pinky Amador, Jason Gainza, Dianne Medina, Alex Castro, Tessie Tomas at Eula Valdes.