Last Thursday night, nagkaroon ng thanksgiving dinner ang Segunda Mano para sa lahat ng staff and cast.

Ginanap ang okasyon sa 9501 restaurant ng ABS-CBN at sumilip kami roon sandali pagkatapos ng presscon ng Eboy na ginanap naman sa Dolphy Theater that same night.

Naabutan namin doon ang main cast na sina Kris Aquino, Angelica Panganiban at Dingdong Dantes.

Tsinika namin sandali si Dingdong na masayang-masaya sa box-office success ng pelikula at siyempre, sa kanyang Metro Manila Film Festival best actor award.

Sa kasalukuyan, nasa P133M na raw ang kinikita ng Segunda Mano at nag-number two sa box-office gross among the movies na ipinalabas sa MMFF.

Siyempre, hiningan namin ng reaksyon si Dingdong tungkol sa lumabas na espekulasyon na brinaso ni Kris ang jurors kaya siya nanalo.

“Unang-una, noong nagsimula kami rito, we had good intentions, even Kris, never namang nagkaroon ng masamang intensyon ’yan sa kahit anong bagay lalung-lalo na sa industriyang mahal na mahal niya.

“So, it is a ridiculous assumption, especially for someone as nice as Kris Aquino. So, para sa akin, all she wants is for people to appreciate kung ano ang ginawa namin and that’s it, nagkataon lang talaga na tinadhana rin ’yung pagkapanalo. So, we’re also grateful na na-appreciate ng jurors ’yung effort namin,” pahayag ng aktor.

Hindi naman siya napikon sa mga naglabasang espekulasyon?

“Hindi naman. Mangyayari’t mangyayari rin naman ’yan sa lahat ng bagay. We cannot please everybody. Of course, para sa iba, maaaring mas gusto nila ’yung gawa nila kesa sa gawa namin.

“But kanya-kanyang opinyon ’yan, so, nirerespeto ko naman sila.”

Wala rin daw siyang sama ng loob kay Laguna Governor ER Ejercito na naging vocal din naman sa kanyang saloobin nang talunin niya ito sa pagka-best actor.

Matatandaang nagpahayag si Gov. ER na disappointed siya at hindi siya nanalo at medyo nagpahaging pa kay Kris.

“Wala po akong sama ng loob sa kanya and in fact, masaya po ako para sa napakaraming awards na tinanggap ng kanyang pelikula.”

Natanong din namin si Dingdong kung may follow-up movie ba ang Segunda Mano since naging maganda nga ang resulta ng joint venture nilang ito ni Kris at say ng aktor, wala pa, pero nag-uusap na yata si Tetay at ang GMA Films.

Ang usapan daw naman kasi talaga, after na gumawa si Dingdong sa Star Cinema, si Kris naman ang gagawa sa GMA Films.

Ang hindi pa masabi ng aktor ay kung ano ang detalye ng pelikula dahil hindi pa raw sila nagkakausap ng Kapuso management.

Most likely raw, kasosyo pa rin siya pero wala pa raw pag-uusap na nagaganap.

Kung sakali, ang gusto ulit niyang follow-up movie nila ni Kris ay horror din. Puwede rin daw part 2 ng Segunda Mano.

“Kasi, nabitin din ako. So, malay natin, ’di ba? Tingnan natin kung ano ang mangyayari,” he said.

Hindi pa raw niya nabibigyan ng bonus ang sarili niya dahil medyo matagal-tagal pa bago nila makuha ang kinita sa movie, pero may balak na raw siya kung saan ito mapupunta.

“A big part of it ay gusto kong i-donate sa foundation namin para mas marami kaming matulungan,” he said.

Ang small part naman daw, baka ibili niya ng something for Marian Rivera, girlfriend niya.             Teternuhan daw niya ang ibinigay na Christmas gift sa kanya ng aktres na Ducati motorcycle.