KUMPLETO na ang puzzle sa buhay ni KC Concepcion matapos niyang makita’t mayakap ang kapatid sa amang si Gabby Concepcion na si Cloie Syquia.

Tweet ni KC na may kalakip na picture ni Cloie, “I can’t believe how much we cried seeing each other. Hugging you after SO long years was the best feeling in the world. I love you!! Aahhhh!”

Balitang dumating ng bansa si Jenny Syquia kasama ang anak. Nakaka-touch namang nag-effort talaga para makita ni KC ang half-sister.

Sa States na kasi nakatira ang kapatid at nang magkita sila ni KC, hayagan ang pagsasabi ni KC sa kaligayahang nadama.

Bukod kay Cloie, close rin si KC kay Garrie, anak naman ng tatay niya kay Grace Ibuna.

* * *

PATUNAY na wala nang bad blood sa ex-couple na sina Martin Nievera at Pops Fernandez dahil magkakaroon sila ng concert tour sa U.S. sa April kasama si Ai-Ai de las Alas.

Ibinalita ito ni Ana Puno ng Star Media, siya ring  producer ng Mr. & Mrs. A nina Regine Velasquez at Ogie Alcasid sa Smart Araneta Coliseum sa Feb. 14.

Wala pang definite places sa States ang U.S. tour nina Martin, Pops at Ai-Ai dahil inaayos pa ang mga venue. Mas gustong sahugan ni Ana ng comedy ang concert dahil ’yun daw ang gusto ng mga tao sa Amerika.

Eh, dahil tuloy pa rin ang recession sa Tate, personal na kinausap ni Ana ang tatlong stars ng concert para magbawas ng talent fee at pumayag naman.

* * *

ANG galing magtago ni Ynez Veneracion ng pagbubuntis, huh! Sampung buwan na pala ang kanyang baby girl na ang tsismis ay isang public official sa Mindanao ang ama.

Pero ayaw kumpirmahin ni Ynez kung sino ang ama ng bata.

“Basta, hindi kasi ako lumabas-labas ng bahay nu’ng buntis ako, hahaha!’ rason niya sa thanksgiving dinner ng Munting Heredera.

Originally kasi, three months lang ang MH. Papatayin din sana ang kanyang character after patayin si Katrina Halili. Pero humaba ito nang humaba.

“Umiyak talaga kami nina Camille (Prats) nang malamang matatapos na. Tapos, sa script, mamamatay ako.

“So, nakakalungkot naman. Hindi ako umiyak dahil sa mawawalan na ako ng trabaho. Hindi ’yung trabaho. I found new friends, a new family. Ay, bigla kong naisip na hindi ko na sila makikita. Kasi naging at home na ako sa GMA. Kaya naiyak akong talaga,” pahayag ni Ynez.

Baka suwerte ang anak niya sa kanya?

“Di ba? Sabi nga nila, lahat naman ng batang dumarating, blessing!” sagot niya.

Itinago talaga niya sa publiko ang anak niya, huh!

“Tito Jun! Eeeeee! Naku... lahat naman ng blessing… kawawa ’yung judgets! Okey naman siya. Gusto mo ’yon? Hahaha!” iwas ni Ynez tungkol sa anak.

Magpapahinga muna ang aktres after MH. Gusto niyang tumaba kahit konti.

“Ang liit kaya ng braso ko! Gusto ko ’yung malaki ng konti para mawala rin muna ’yung character ko,” saad ng seksi star.

Naging kontrobersyal din si Ynez nang ibulgar niya ang hindi pagbayad sa kanya ng balance niya sa isang show sa Agusan del Sur.

“Sa 13 years ko sa showbiz, ngayon lang nangyari ’yung hindi ako binayaran sa show, ’yung 50 percent. Balak pa nilang kumuha ng ibang artist na hindi rin nila babayaran.

“Sabi pa nila, hindi naman daw ako kagandahan at mukha akong pera. Sabi ko, hindi pala ako kagandahan, bakit ninyo ako kinuha?

“Tapos, sabi mukhang pera ako. Sabi ko, lahat tayo nagtatrabaho at karapatan natin na bayaran tayo sa trabaho natin.

“Nakakaloka ang mga taong ganyan. Tapos tinu-twitter pa ako at kaninang umaga, siniraan daw ako doon kasi meron silang radio station doon.

“On air, sinasabi na hindi ako kagandahan at banned daw ako roon. Eh, ’di i-ban ninyo, pakialam ko! Teka nga… maisumbong nga ito. Abuloy na ’yung 50 percent,” diin ni Ynez sa panloloko na ginawa sa kanya.

* * *

HAPPY birthday to our dear editor, Ian F., na kasabay ang kambal na Richard at Raymond Gutierrez at ang father naming wala na sa buhay namin na kasabay naman ang apo naming si Francis Joshua “Kiko” Nardo Punzalan ngayong araw na ito! (Thank you, dear JN! – IFF)