Isang Tiffany necklace na may heart-shaped pendant ang Christmas gift ni Gerald Anderson kay Sarah Geronimo.

Ito ay inamin mismo ni Sarah sa ginanap na thanksgiving party for the press last Wednesday night sa Imo’s Restaurant na pag-aari ng kanilang pamilya along Mindanao Ave., QC.

Matagal bago napaamin ng press si Sarah. Talagang ayaw niyang sabihin noong una dahil nakakahiya naman daw na siya pa ang magsabi kaya si Gerald na lang daw ang tanungin.

Pero hindi talaga tinantanan ng press si Sarah at dumating pa sa puntong tila nag-Pinoy Henyo pa kami na hinuhulaan pa namin kung ano ito.

Ang dalaga naman, hindi malaman ang gagawin kung paano iiwas sa tanong.

Hanggang sa bandang huli, sambit niya, “Okay lang ba ’yung sabihin? Okay lang naman siguro. Ano po, binigyan niya ako ng necklace.”

Asked kung ano’ng klaseng necklace, bagama’t hesitant pa rin, sinabi na rin niyang Tiffany nga ito na may heart-shaped pendant.

At hindi lang siya ang binigyan ni Gerald ng regalo kundi maging ang kanyang magulang at kapatid.         Pumunta pa raw ng bahay nila ang young actor para ihatid ang Christmas gifts.

May gift din naman daw ang buong family niya kay Gerald. Binigyan daw nila ito ng shirt na si Mommy Divine (nanay ni Sarah) ang bumili since wala nga raw siyang time na mag-shopping.

Nanliligaw na ba sa kanya si Gerald?

“Hindi, hindi talaga,” mabilis niyang sagot.

Pero the fact na tumanggap siya ng alahas, ibig sabihin, may something na sila.

“Hindi, hindi naman po sa ganu’n. Siyempre, espesyal naman po ’yung tao, nakatrabaho natin siya at nakita ko naman kung gaano siya kabuting tao, kabuting anak din sa mommy niya, kung gaano siya ka-sweet sa mommy niya.

“Siyempre, for a guy, ’di ba, na maging ganu’n ka-sweet sa mommy niya, nakakatuwa. So, ’yun lang naman po. Hindi ko naman po itatanggi na espesyal din naman po ’yung tao,” pahayag ni Sarah.

Pero hindi suot ng Pop Star ang kuwintas at aniya, isusuot din naman daw niya ito siyempre.

Ready na ba siyang magmahal ulit?

“Hindi pa,” she said.

Pero nag-e-entertain naman siya ng suitors?

“Ay, ano lang naman po, wala naman po sigurong masama na hayaan natin ’yung friendship, ’di ba po? Pero sa ngayon, wala po munang relationship.”

“Titingnan po natin kung kelan po ready na itong puso ko na magmahal ulit.”

Samantala, nabanggit din ni Sarah na may bago siyang show sa ABS-CBN na magsisimula ng mapanood ngayong February. Ito ay ang Sarah G. Live which will air every Sunday night.

Aminado si Sarah na kinabahan at natakot siya nang unang sabihin sa kanya ito ng management.

"Siyempre ho, nu’ng una, ayoko, natatakot ako. Kasi sariling show ko na 'yon, eh, saka malaking responsibility 'yon sa akin as an artist. Pero blessing ito. Napakagandang blessing nito at another challenge para sa akin para mag-grow as an artist and as a person. So, ba't ko tatanggihan?”

Dahil kailangan ng malaking preparations para sa show, kakailanganin ni Sarah na magpahinga muna sa ASAP kung saan isa siya sa mainstays na napapanood tuwing Sunday ng tanghali.

Pansamantala lang naman daw ito habang may Sarah G. Live siya.

"Pero siyempre, ’pag may mga guesting, show, project na kailangang i-promote, babalik tayo sa ASAP,” aniya.

Tuloy pa rin daw ang concert tour niya abroad sa April at siguro raw, magte-tape na lang siya ng episodes for Sarah G. Live kung sakali.

Tungkol naman sa third movie nila ni John Lloyd Cruz, ang alam daw niya, tuloy pa rin ’yun at sinabihan na siyang magsisimula na sila ng shooting sa February.