Obviously, si Pokwang ang tinutukoy sa mga bllind item na komedyanang dinededma at hindi man lang tulungan ang kuyang nakakulong ngayon sa Dubai sa kaso ng hindi pagbabayad ng loan.

Sa blind item na ’yon sa isang blog, halos isumpa ng karamihan sa respondents sa kanilang comments si Pokwang na ang bottomline ay anong klaseng kapatid ito at hindi man lang dalawin ang kapatid na nakakulong?

Para bang kung makahusga ang mga tao, kilalang-kilala nila ang likaw ng bituka ng magkakapatid na Subong.

Hindi alam ng mga ito na itinataguyod ni Pokwang ang pag-aaral ng mga anak ng kuya niya dahil hindi nagpapadala ang ama ng mga pamangkin niya noon pa.

Hindi naman ito 'yung napagbintangan na pumatay o ipinagtanggol lang ang sarili kaya nakapatay at nakulong.

Utang ito na hindi binayaran dahil nagpabaya ang kuya niya, kaya nakulong. Ni hindi rin daw alam ng mga anak ng kuya niya kung ano nang balita sa ama nila, dahil hindi rin nagpapadala at hindi rin nangungumusta noon pa.

Itinanong man lang ba ng mga humuhusga kay Pokwang kung sino ang nagbayad ng placement fee at nagpalipad sa kuya niya sa Dubai?

Na nagtatrabaho na nga sa ibang bansa, pero si Pokwang pa ang nagpapadala ng dollars sa Dubai dahil kinakapos ang kapatid niya?

Hindi naman nanunumbat si Pokwang, pero kami na rin ang nag-suggest sa kanya na ilalabas namin ito bago pa um-OA ang iba sa panghuhusga sa kanya.

Doseng magkakapatid sina Pokwang. Ilan ding kapatid at mga pamangkin ang itinataguyod niya, kaya kayod-kalabaw ang komedyana.

Mas nag-aalala si Pokwang sa nanay niyang ayaw niyang atakehin sa puso sa nangyari sa kapatid niya.

Pero si Nanay Gloria na rin ang nagsabi: "Masakit sa akin bilang ina, pero kasalanan ’yon ng kuya n’yo. Hindi naman tayo nagkulang sa kanya. Kung doon siya matututo, kailangang harapin niya ang resulta ng ginawa niya."                      Ogie Diaz