ISINAMA ng mag-asawang Ogie Alcasid at Regine Velasquez ang anak nilang si Nathaniel sa presscon ng Valentine concert nilang Mr. & Mrs. A na magaganap sa Smart Araneta Coliseum sa February 14 mismo.

May special participation kasi ang bata sa concert bukod sa ilang guests nilang sina Dingdong Dantes, Erik Santos, Angeline Quinto, Vice Ganda, Michael V at cast ng Bubble Gang.

Aminado si Regine lumaki siyang tulad ng elepante matapos manganak. Ang pagyo-yoga ang naging daan upang mabawasan ang taba niya.

“Hindi kasi puwede mag-diet dahil nagbi-breastfeed ako. Gusto ko, hanggang one year si Nate, saka ako titigil.

“Eh, ayoko nga munang tumanggap ng trabaho dahil ang liit-liit pa ng anak ko. Kasi ’pag may soap ka, wala ka nang buhay. Ayoko namang mangyari ’yon,” pahayag ni Regine.

Na-miss niya nang husto ang mag-perform although nakakaramdam siya ng takot ngayong malapit na ito.

“Kasi ’pag nagbabasa ako sa Internet, ’pag C-section (ceasarean), medyo hindi agad bumabalik ang boses o hirap kumanta. Basta, ang dami kong horror stories na nabasa sa Internet.

“Ang ginawa ko after ng operation, after giving birth, one week pa lang, nag-yoga na ako. You know what? I’m back and I can sing again! Hahaha! I recorded a couple of songs for my baby last night. Kaming dalawa (ni Ogie).

“Hindi ako nahihirapang kumanta. Parang it’s back. Importante lang naman ’yung breathing, so, sana manood kayo ng concert,” paliwanag ni Songbird.

Paano naman niya na-handle ang post-partum blues pati na ng asawa niya?

“Kasi nu’ng umpisa, hindi nagla-latch si Nate. So hindi ko siya… tapos, konti lang ang milk ko. ’Yung production niya, hindi ganoon kadami. So, for three weeks, bumibili ako ng breast milk sa breast milk center ba ’yon?

“Merong days na iyak ako nang iyak dahil hindi ko alam kung paano ko pakakainin ang baby. Ayoko munang mag-formula sana. So, ’yon ‘yung parang nag-trigger kasi hindi ko siya… Kasi nag-prepare ako sa lahat. ’Yung things niya, damit, whatever. Mga gamit.

“Tapos, psychologically, prinipare ko sarili ko. Mapupuyat ako. Hindi ako nag-prepare sa breastfeeding. Kasi thinking ko, may breast ka naman. Nandiyan lang ‘yan! Dedede ’yan! Hahaha! Ganoon ang feeling ko.

“’Yun pala, that’s the hardest! One of the hardest. Kasi may nabasa akong article na kapag premature ang baby, hindi agad sila agad nagla-latch talaga. Nakaka-depress talaga! Hindi mo mapadede ang baby. Umiiyak! Hindi mo ma-feed, so, feeling mo, inadequate ka.

“But then, meron pa akong breastfeeding counselors. But sa dami ng nakausap kong breastfeeding counselors, one day, while I was feeding him, nilagay ko lang siya sa pillow at sabi ko, ilabas ko kaya ’yung boobs ko at ipahanap ko sa kanya, he did! Hahaha! Hinanap niya, tapos, dumede lang siya mag-isa.

“Sabi ko, ‘Ah, okey! I guess, ready na siya. Hahaha!” kuwento ni Regine bilang ina.

“So, after that, nu’ng time na ’yon, nawala na ’yung blues. ’Yung baby blues ko nawala. ’Yun lang pala ’yon! Hahaha!” dagdag pa niya.

Biro naman ni Ogie sa post-natal blues ng asawa, “Naiiyak na lang ako sa isang tabi pero hindi ko pinapakita sa kanya!”

“Paano ba? Si Regine naman, when she wants to focus on something, gagawin niya talaga. So, ’yung pag-iyak niya, sa tingin ko, hindi naman out of depression ’yon. Napu-frustrate lang siya.

“Siyempre, sa akin, i-encourage siya. Kaya mo ’yan. Lalabas din ’yan. Kasi alam mo ba ang tiyan ng bata? Ganyan lang kaliit. Kung paiinumin mo ng galun-galong gatas, malulunod ’yan. But then again, hindi ako ang nanay, it’s her who really feels, so, I’m just there so say, ‘you’re doing the right thing. Tama ’yang ginagawa mo.’

“Siyempre ’pag bago lang magulang, nandoon ’yung self doubt. Madaming ganoon. Ina-assure ko siya na tama ang ginagawa niya. Nu’ng isinilang si Nate, he was 4.5 pounds. He’s so tiny that you can hold him in your arm. One arm. He’s so thin. So frail pero ang guwapo niya. ’Yun ang hindi ko maintindihan, eh! Napakapayat, napakalikot, napakapogi!

“After two months, he is nine point something pounds! Lahat ’yan nanggaling sa breast ng asawa ko, so that’s amazing. So, tuwang-tuwa siya. Tumawag siya sa akin the other day, ang sagot ko sa sabi niyang, ‘Hon, nine pounds na si Nate,’ ‘so, puwede na siyang mag-asawa?’ Hahaha!

“I was just there to support her and you are the best mommy!” pagmamalaki ni Ogie kay Regine.

Nabigla lang ang singer-songwriter nang tanungin kung tuloy na ang binyag ni Nate this Sunday.

“Yes, tuloy! Paano ninyo nalaman? Hahaha!” tanong ni Ogie pero sinabi rin niya ang ilan sa siyam na pares ng ninong at ninang.

“Ang ninong at ninang ay tagsisiyam. Sa mga lalaki, nandiyan si Congressman Manny Pacquiao, ’yung asawa niya, si Dingdong Dantes, Boss JRD (Jimmy R. Duavit), si Senator Bong (Revilla Jr.), kapatid ni Regine, kapatid kong lalaki, si Raul Mitra, Jojo Velasquez. Sino pa ba?

“Sa mga babae, sina Juday, Kris Aquino, Ai-Ai de las  Alas. Si Michelle (van Eimeren, ex-wife niya). Grace Reyes,  kaibigan niya, si Cacai (Mitra). Katy Perry na naman?

“’Yun ’yung Catholic baptism niya. Ako kasi, Kristiyano, kaya meron kaming dedication. Pagkatapos na siguro ng concert. Nandoon sina Gary Valenciano, Piolo Pascual at Mark na asawa ni Michelle. Pero sa Linggo, ’yun ang aming Catholic,” balita ni Ogie.

Magkakaroon pa raw ng dedication si Nate sa ibang date.