Natagpuan na ang bangkay ng nawawalang mountaineer apat na araw matapos itong ta-ngayin  ng malakas na agos ng tubig nang tumawid ang grupo nito sa ilog sa kasagsagan ng malakas na pagbuhos ng ulan sa bayan ng Rodriguez.

Sa ulat ni Supt. Rommel Estolano, hepe ng pulisya, kay Senior. Supt. Manuel Cesar Prieto, Rizal police director, ang bangkay ni Adrian  Alba, 25, 4th  year  college  student, ng Blk. 61,  Lot 12, Fortune,  Bgy.  Rizal, Makati City, ay natagpuan  sa ilalim  ng  malalaking  tipak  ng  mga  bato  sa  Sitio  Wawa, Bgy.  San  Rafael, Rodriguez, Rizal.

Dakong alas-8:30 ng umaga noong September 3 nang matangay ng agos ang biktima sa Wawa River sakop ng Sitio Kayropa, Bgy. San Rafael habang tumatawid kasama ang 23 pang mountaineers.

Dakong alas-6 naman ng umaga nang matagpuan ito ng rescue team  mula sa Montalban Rescue Team at Philippine Coast Guard limang kilometro ang layo sa kinaanuran nito.

Nabatid pa na ang bangkay ay nasa state of decomposition na nang makita at halos lomobo na ang buong katawan nito.

Ang grupo ay nasa lugar  para mapagmasdan ang kagandahan ng makasaysayang Wawa Dam at ang Pamintuan Cave nang maganap ang insidente.

Sa record ng pulisya ang grupo ay nagpaalam sa tanggapan ng Tourism at DENR Office ng Rodriguez para magmasid lamang sa Wawa Dam  subalit nagtuloy ang mga ito sa Sitio Kayropa para makita ang Pamintuan Cave.