MAAARI pa ring mangampanya bilang mayoral candidate sa Mandaluyong City si Ernest Albert Buan subalit kailangan niya itong gawin sa loob ng kulungan, ayon sa city election officer.

Sa report ng Inquirer.net, sinabi ni Mandaluyong election officer Romeo Alcazar na hindi na-diskwalipika sa mayoral race si Buan, 28, kahit na may drug charges laban dito.

“As far as his candidacy is concerned, there is no effect,” ani Alcazar.

“One of the grounds for disqualification is having a final judgment to the crime, and in his case, he is still under investigation,” paliwanag pa nito.

Binigay na halimbawa rin ng election officer ang mga kaso nina Sen. Antonio Trillanes IV at dating Zamboanga del Norte Rep. Romeo Jalosjos na nagawang mangampanya habang nakakulong.

Si Buan, na nasa kustodiya pa rin ng pulisya, ay nakatakdang basahan ng sakdal sa Pebrero 15 sa sala ni Judge Abraham Borreta ng Pasig Regional Trial Court.

Ang drug charges laban kay Buan ay bunsod ng pagkakahuli rito na nagbebenta raw ng cocaine nitong Enero 29, 2009 sa isang fast food restaurant sa Pasig City.

Pinabulaanan na ni Buan ang akusa at sinabing biktima lamang siya ng frame-up.