4,949 guests

Wrong syntax ang problema nina Gen. Santiago at Spox Harry Roque

  • Written by Allan Encarnacion
  • Published in Opinion
  • Read: 210

Hala bira!

SINAYANG ni General Dionisio Santiago ang kanyang appointment.

Isa siya sa pinakahuling appointee ni Pangulong Duterte na magpapalakas sana sa anti-drug campaign ng gobyerno pero mukhang ipinahamak siya ng kanyang bibig.

Tinangka sanang sagipin ni Dionisio ang kanyang maling pahayag pero sabi nga, nailuwa na kaya mahirap nang lunukin.

Nakita natin ang punto ni Presidente sa kanyang sinabi na kaya nga hinirang si Mang Dionisio sa Dangerous Drugs Board ay para makabuo siya ng mga plano at mga programang lalo pang magpapalakas sa pagkilos ng estado laban sa illegal drugs.

Ang problema, sa halip ilagay sa papel at isumite sa lamesa ng Chief Executive, mas napili ni General na isigaw sa telebisyon ang kanyang nasa isip.

Malaki ang tiwala ng Pangulo kay Santiago. Sa katunayan, sa day one ng kanyang Presidency ay si General na ang directly quoted sa 4 million Pinoy drug addicts. Paulit-ulit ang ganitong pahayag ng Pangulo na ang attribution ay nagmula kay General Santiago.
    
Alam na ni Santiago kung paano mag-react si Duterte kapag binabatikos ang kanyang kampanya laban sa droga, kahit si Obama, ang UN, ang EU at ang Human Rights ay nakakatikim ng mag-asawang sampal mula kay Digong kapag wala sa hulog ang pagpuna.
    
Sobrang passionate ng Presidente na puksain ang droga dahil inaral na niya mabuti ’yan. At alam niyang drugs ang ugat ng maraming krimen kaya iyon ang nasa top agenda ng kanyang pamamahala.
    
Tapos, paggising niya isang umaga, iyong taong inaasahan niyang tutulong sa kanya at magdedepensa ng lahat ng programa laban sa illegal drugs ay siya pa mismo ang magsasabing mali ang mega drug rehab sa Nueva Ecija, aba’y Houston, we have a problem!
    
Puwede naman niyang sabihing dapat palawakin pa ang drug rehab, ilapit natin sa community kung halimbawa mang hindi dinadala doon ng pamilya ang kanilang kaanak na adik.
    
Sa tingin ko, iyon naman talaga ang gusto niyang sabihin, mali lang ang paraan. Sabi nga sa aming mga masscom graduate, wrong syntax ka bata!

* * *
    
Isa pang tinamaan ng wrong syntax ay si newly appointed Presidential Spokesman Harry Roque.
    
Hataw ang inabot ni Roque sa Diehard Duterte Supporters matapos magbitaw ng mga maling salita.
    
Iyong target audience ni Roque na DDS na plano niyang kumbinsihin at niligawan na mapalapit sa kanya ay busted ang ending. Sa mga video na inilabas nina Maharlika at Sass Ragot, parang pinatikim si Roque kung paano magalit ang DDS. Medyo balanse pa at mahinahon ang video message ni Mocha Uson.
    
Hindi ko pa nakikita kung may video na si Atty. Bruce Rivera at RJ Nieto alyas Thinking Pinoy na laban kay Amazing Harry.
    
Ang problema kay Roque, mukhang sa legal parlance lang siya dalubhasa subalit kulang sa pakiramdam. Isa ako sa mga unang naniniwala sa kakayahan ni Roque at alam kong makakabangon pa rin siya, lalo na sa mata ng DDS.
    
Ang naging sabit ni Harry ay sa kagustuhan niyang pasayahin ang mainstream, naapakan niya ang ego ng DDS. Katulad din ng naging pagkakamali ni General Santiago, bakit kailangang ihayag ni Harry sa media ang kanyang plano na turuan si Mocha ng importansiya ng media at kung paano ito itrato?
    
Sa unang tingin, may himig ng malasakit subalit sa malalimang pagsipat, lumilitaw na hinihiya niya si Mocha at itinataas niya ang mainstream media.
    
Parang sinabi mo sa iyong nililigawan na mahal kita kahit mabaho ang iyong hininga. At sinabi mo iyon gamit ang trompa sa mismong bintana ng iyong niligawan habang ang buong kapitbahay ay nakikitsismis.
    
Tsk, tsk, tsk, kailangan ’ata ay human relations at behavioral science ang pag-aralan ni Harry Roque kung gusto niyang umabot sa 2022.

This email address is being protected from spambots. You need JavaScript enabled to view it.