‘Sindikato’ sa pantalan dapat matuldukan

October 12, 2018

“MATINDI” ang “kantyaw” na inabot natin, kasamang Non Alquitran noong Miyerkules, bago nagsimula ang pagdinig ng ‘Senate blue ribbon committee’ sa isyu pa rin ng shabu smuggling.

Dangan kasi, “hindi ko madalumat” kung kailan at saan kami nagkita nitong abogado ni dismissed PNP colonel, Jojo Acierto.

Eh, ‘yun pala naman, nagkita na kami noong araw pa, sa bahay ni Boss Erap, dahil ang nasabing matikas, makisig at ‘oozing with sex appeal’ ay wala nga palang iba kundi si Atty. Rafael ‘Ralph’ Calinisan, ang anak ni ex-PNP general, Roberto ‘Bobby’ Calinisan (sumalangit nawa) na siyempre pa ay “bumilib” tayo dahil sa pagiging ‘loyal’ kay Pang. Erap.

‘Oh well,’ pasensiya ka na, ‘Boss Ralph,’ hane? Medyo “tumatanda” na itong kaibigan mo, hehehe!

At napag-usapan na rin lang si Col. Acierto, hindi pumapabor sa kanya ang nagiging takbo ng mga pangyayari, hindi ba, dear readers?

Sa inilabas kasing ‘matrix’ ng Palasyo  noon ding Miyerkules, ‘on top of the drug syndicate pyramid’ itong kliyente ni Atty. Ralph, kasama si suspended PDEA deputy director, Ismael Fajardo.

At bago pa man pumayag ang Malacañang na ilabas ang nasabing ‘matrix’ (na batay naman sa isang ‘secret report’ na ginawa ng ating ‘intelligence community) sinabi na umano ni PDU30 kay Sen. Dick sa kanilang naging “huntahan” na ‘involved’ sa iligal na droga si Acierto, Fajardo at ang kanilang “bata” sa Bureau of Customs (BoC) na si intel agent, Jimmy Guban.

Sapul nang magsimula ang “pagbusisi” ng Senado sa isyung ito noong isang buwan, “detenido” pa rin hanggang ngayon sa Senado itong si Guban, dear readers.

Bagaman, sa itinatakbo pa rin ng pangyayari, naniniwala tayong “kuntento” na si Guban sa kanyang sitwasyon, kumpara sa mga nakaraang pagdinig na panay ang padala niya ng ‘love letter’ kay Sen. Dick para payagan siyang makauwi na sa kanyang mansion, err, bahay, sa Cavite.

Aber, ngayong “nagladlad” na kasi siya ng kanyang mga “nalalaman” hindi malayong ‘six feet below the ground’ ang abutin niya sakaling mawala sa kustodya ng Senado.

Sa huling dalawang pagdinig ng SBRC, Boss Joey Venancio, abay’ “dinaliri,” nitong sina Acierto at Guban ang isa’t-isa, hehehe! Sa wikang Ingles? ‘They ‘fingered each other,’ aww!

Sa mas simpleng lengguwahe, dear readers, ‘yung “dinaliri nila ang isa’t-isa,” “nagturuan” sila, hihihi!

Sa naging pagdinig noong Setyembre 26, una nang “itinanggi” ni Col. Acierto na “siya” ang ‘handler’ sa mga operasyon sa iligal na droga nitong si Guban.

Bago “inilaglag” ni Acierto si Guban, una na kasi siyang “idiniin” nitong protektor ng isang notoryus na smuggler sa NAIA-IBR (na protektado naman ng kanyang mga bayarang aso sa media).

Sa isang ‘video’ ng senadora nakita na “siniko” ni Fajardo si Guban nang tinatanong naman ni PDEA Director General Aaron Aquino kung “sino” ba ang ‘handler’ niya.

Suspetsa ng mga miron na nakapansin sa insidente, “siniko” ni Fajardo si Guban para “huwag” siyang “inguso,” err, “ituro,” kaya ang “ikinanta” nitong si Guban ay si Acierto.

Sa pagdinig naman noong Miyerkules, mas “malaking daliri” ang ginamit ni Guban laban kay Acierto nang sabihin nitong si Acierto ang “nagpasok” ng mga shabu na iniimbestigahan ngayon ng Senado, kaya, aray! Anlaki nga,” hehehe, ayy, huhuhu!

Hindi pa tapos ang bagong ‘telenovela’ na ito sa Senado kaya patuloy nating subaybayan, dear readers.

* * *

Kamakailan, isang ‘press release’ ang inilabas ng ‘Department of Trade and Industry’ (DTI) kung saan sinasabing ‘normal’ at “walang” nangyayaring ‘port congestion’ sa POM at MICP.

Ang pahayag ay batay naman sa naging pag-uusap ng BoC at DTI kung saan may mga ipinakita pa umanong datos ang Aduana upang palabasing pulos “reklamador” lang, kundi man sinungaling, ang mga importer, customs brokers at ang mga ‘truckers.’

Tanong naman kasi ng mga nakakausap natin, kung totoong walang port congestion, ano naman itong bagong ‘peak season charge’ na sinisingil ng mga shipping lines sa kanila, aber?

Sa mga nakaraang panahon na hindi maitanggi ang port congestion, sumisingil nang ‘port congestion charge’ ang mga shipping lines. Wala pa dito ang container deposit, container imbalance at kung ano-ano pang “pangalan” upang “huthutan” ang mga importer at broker.

At dahil nga nabola, err, napaniwala nila ang DTI (na may hurisdiksyon sa mga shipping lines sa pamamagitan ng Philippine Shipping Bureau) na “walang port congestion,” “nag-imbento” ang mga gahamang ito ng bagong teremino: ‘peak season charge,’ sa halagang US$ 100/20 footer at US$ 200/40 footer.

Hmm. Hindi pa ba “nakakahalata” ang gobyerno at si DTI Sec. Ramon Lopez na ginagawa na lang tayong mga “ogags” nitong AISL, kasama ang mga korap na opisyales d’yan sa PPA at mga ‘private arrastre operator?’

Oh yes, PDU30, may isang malaking sindikato d’yan sa pantalan na “dekada” nang “gumagatas” sa mga importer at customs broker. At ‘yan ay ang “sindikato” nitong mga shipping lines, arrastre at PPA.

Aber, “bulag” na lang ang hindi makapapansin na ‘yang isyu ng ‘port congestion’ ay tila isang malaking “maniobra” ng ilang grupo d’yan sa pantalan para lang may dahilan silang maningil ng maningil ng mga “inimbentong” ‘port charges.’

Kung malaking problema natin ang mga ‘underground criminal syndicate’ na pasok sa iligal na droga at smuggling, matagal na rin nating problema, mga kabayan, itong mga ‘white collar syndicates.’

Sana, magkaroon naman ng pagkakataon si PDU30 na masilip ang matagal nang kawalanghiyaang ito ‘dyan sa pantalan. Sana naman!