Si Jimmy Guban

September 15, 2018

BAGO ang lahat, “pinag-iingat” natin ang ating mga kababayan, dahil sa inaasahang “pagtama” ng ‘Super Typhoon Ompong,’ na ayon na rin sa mga ulat ay “singbangis” ng bagyong ‘Yolanda’ (Hainan) ang “dala-dalang” panganib at perwisyo.

Limang taon na ngayon matapos ang ‘Pinas ang “masapol” nitong si ‘Yolanda’ subalit, sa lawak at laki ng ginawang perwisyo, “ramdam” pa rin natin ang “pahirap” na idinulot nito, kaya…ingat tayong lahat!

At kasama sa ating ‘reminder’ sina NPC prexy, Rolly ‘Lakay’ Gonzalo at iba pa nating mga kasamahan sa NPC board dahil “tumulak” sila patungong Bicol noong Huwebes ng gabi, sa imbistasyon (ulit) ng ating mga “kapatid” doon sa media.

* * *

Sa pagpapatuloy naman ng ating kolum noong Martes hinggil sa naging pagdinig ng Senado sa isyu ng ‘drug smuggling,’ alam ba ninyo na “matagal” nang kontrobersiyal itong si BoC intelligence officer, Jimmy Guban, dear readers?

At nang ilarawan siya ni Senate Blue Ribbon Committee chairman, Sen. Dick Gordon, na “hindi maganda ang reputasyon mo,” may batayan ang tinuran nitong ‘boss’ ng ating “kapatid” na si Lee Ann Ducusin.

Nang “itayo” ng administrasyon ni Noynoy Aquino ang “CPRO” (Customs Policy Research Office), ang “freezer” ng Aduana dakong 2013 (na ngayon ay “CMU”—Customs Monitoring Unit), isa itong si Guban sa higit 50 opisyal, empleyado at mga operatiba ng BoC na “itinapon” sa CPRO dahil sa mga bintang at sumbong ng mga pang-aabuso at katiwalian sa serbisyo.

Dakong 2015, kasama rin ang pangalan ni Guban sa mga dating miyembro at opisyales ng Intelligence Group at Customs Intelligence and Investigation Service (IG-CIIS) sa “pinangalanan” ni ex-DCI Jessie Dellosa at ipinalathala ang mga pangalan sa mga pahayagan bilang babala sa publiko na huwag makipagtransaksyon gamit ang tanggapan ng IG-CIIS.

Ayon pa sa mga miron, “notoryus” sa “pangingikil” sa mga ‘stakeholders’ itong si Guban at ang kanyang grupo, partikular na sa hanay ng mga ‘Fil-Chinese’ na may-ari  ng mga warehouse sa Metro Manila at mga karatig-probinsiya na siyang “imbakan” naman ng mga ‘imported goods’ --  ‘smuggled’ man o hindi (pero ang “bulto,” talaga namang ‘smuggled,’ hehehe).

Masasabi namang  ‘na-rehabilitate’ si Guban sa panahon ng mga ‘Magdalo’ ni Comm. Nick Faeldon kung saan ilang malalaking ‘warehouse’ na “umaapaw” sa mga ‘smuggled goods’ ang “natimbog” ng CIIS ni Dir. Neil ‘Col. Star’ Estrella.

Ayon pa sa mga miron, “miyembro” din ng ‘Guardians’ itong si Guban kaya hindi naman nakapagtataka na “arugain” siya ng Grupong Magdalo sa BoC dahil alam naman ng lahat na “kasabwat” ang mga Guardians sa mga nabigong “kudeta” ng ‘Magdalo’ noong termino ni PGMA.

Ayon pa sa ilang kaibigan, dating operatiba ng “EIIB” (Economic Intelligence and Investigation Bureau) itong si Guban bago “napalipat” sa BoC, matapos namang buwagin ni Pang. Erap ang ahensiya dahil naging notoryus na bilang “protektor” ng mga ‘smuggling syndicates.’

At kahit may “malansa” o ‘unsavory reputation,’ lumalabas na si Guban din ang ‘contact’ at ‘linya’ ng PNP at PDEA sa loob ng Aduana, kung ‘anti-illegal drugs’ ang pag-uusapan.

Lumalabas din na ang kanyang ‘main handler’ sa PNP ay si S/Supt. Jojo Acierto (na sabit sa isyu ng AK-47 deal sa panahon ni Noynoy) at sa PDEA naman ay ang kanyang ‘classmate’ na si deputy director, Ismael Fajardo.

Kung bakit naman “pumayag” ang BoC na “tao” nga nila si Guban pero hindi naman sa ahensiya o kay Comm. Sid o kay DCI Dick Quinto ang loyalty, at kung bakit wala nang nangyari sa mga reklamo at sumbong laban sa kanya, ay mga bagay na hindi pa rin naipapaliwanag ni Comm. Sid o DCI Quinto.

Bakit nga ba, mga bosing, hehehe!

Kung bakit din sa sandamakmak na mga ‘intel’ sa BoC, tila “lubos” ang naging pagtitiwala sa kanya ni Col. Acierto (na ayon sa isang kaibigan ay ‘outstanding anti-illegal drugs operative’), harinawang malinawan din natin sa mga susunod na pagdinig dahil “imbitado” na si Col. Acierto ng Senate Blue Ribbon Committee.

Isang isyu na gustong linawin kasi ni Sen. Dick kay Col. Acierto at PDEA DD Fajardo, bilang mga “handler” ni Guban ay kung ‘with approval’ ba nila ang umano’y ginawang pagkuha ni Guban ng isang ‘fall guy’ (pinapirma sa isang ‘affidavit’ upang “aminin” na “kanya” ang mga nakuhang ‘scrap magnetic lifter’ sa GMA, Cavite) para naman “maisalba” ang ‘consignee’ ng kontrobersiyal na kargamento, itong SMYD Trading.

Sa ating nakaraang kolum, itong bagay na ito ang “bumagabag” sa atin, dear readers. ‘Yun bang… may mga tao pala na kayang “magpahamak” ng mga inosente? Harinawang maipaliwanag din ito ng husto ni Guban sa mga susunod na araw.

Sa “huntahan” naman namin ni Guban, nakita natin na talagang “tiwala” at “kampante” siya na kahit anong mangyari, HINDI siya “ilaglag” ni Col. Acierto.

Kumbaga, “iba ang may pinagsamahan,” hehehe!

Sakali raw kasi na “traydurin” siya nitong si DD Fajardo at Col. Acierto, “ibang usapan” na nga naman ‘yan. At aniya pa, “marami” siyang “alam.”

Abangan na lang natin ang mga susunod na kabanata, hindi ba, Pang. Rody?

At kailan ba “makakauwi” sa kanyang bahay itong si Guban, Sen. Dick dahil ang panawagan kasi niya: “Maawa” ka naman, please!

Abangan!