Senator ‘You-Know-Me’

September 21, 2018

BINABASA ninyo ito, dear readers, nasa Guangzhou, China, na ang inyong lingkod, bahagi ng isang delegasyon ng ‘Philippine media,’ na naimbitahan ng ‘Fuda Cancer Hospital,’ isa sa mga “sikat” at “pinagtitiwalaan” na pagamutan sa ‘Chinese mainland, pagdating sa sakit na kanser.

Inaasahan namin na sa pagbisitang ito, isang ‘partnership’ ang ating malagdaan sa pamunuan ng Fuda Cancer Hospital para na rin sa kapakanan ng ating mga “kapatid” sa media na may ganitong karamdaman. Harinawa, kaya... abangan!

* * *

Kung maraming mga miron at kapwa mambabatas ni Senate blue ribbon committee chairman, Sen. Dick Gordon, ang “naiinis” sa kanyang “monopolyo,” ehek, pagiging “agresibo” sa tuwing may pagdinig ang kanyang komite, napalitan na ito ng paghanga at ‘appreciation,’ kasamang Lee Ann Ducusin, peks man!

Dangan kasi, mga kabayan, sa ginagawa nating pagsubaybay sa ginagawang pagdinig ng Senate blue ribbon committee sa isyu ng talamak (pa rin) na ‘drug smuggling’ sa bansa, napansin natin na talaga palang ginagawa niya ang kanyang ‘homework’ at “pagsasaliksik.”

Kumbaga, dito sa “masalimuot” na isyu ng drug smuggling na aniya pa ay “mapanganib” (‘dangerous’) para sa ating lahat dahil sa perwisyong idinudulot nito sa ating lipunan, patuloy na “bigo” ang mga imbitadong ‘resource persons’ na “palundagin” si Sen. Dick at “ipihit” ang isyu at diskusyon sa kanilang sariling ‘hidden agenda.’

Halimbawa na lang ang sinapit nitong si BoC intel agent, Jimmy Guban, na sapul pa noong Setyembre 11 ay “detenido” sa Senado, mga kabayan.

Sa halip na “papuri” at “paghanga” dahil sa kanyang mga ‘accomplishment’ sa paglaban sa smuggling, partikular na sa isyu ng iligal na droga, nagawang palabasin ni Sen. Dick na ito palang si Guban, dear readers, ang nasa “gitna” o “sentro” (‘center’) ng pagpasok sa bansa ng aabot sa higit P10 bilyong shabu noong nakaraang Hulyo!

Ang una rito ay ang higit P4 bilyon shabu na “natimbog” sa MICP noong Agosto 7 na “ipinarating” nitong ‘Vecaba Trading’ at ang umano’y “nakalusot” na 1,000 kilo ng shabu na “pinarating” naman umano nitong SMYD Trading.

Natagpuan sa isang warehouse sa GMA, Cavite ang umano’y mga “wala nang laman” na mga magnetic scrap lifter na umano’y “pinagtaguan” ng iligal na droga noon namang Agosto 9, dalawang araw matapos ang insidente sa MICP.

* * *

Wala tayong masamang tinapay dito kay Guban, dear readers, dahil bago nagsimula at pagkatapos ng pagdinig noong Setyembre 11, “maayos” pa nga ang aming huntahan.

At dahil ‘up close and personal’ kaming dalawa habang nag-uusap, gusto ko pa ngang maniwala na “totoo” ang lahat ng kanyang sinasabi -- bagaman nga “TH” (tamang hinala) si Sen. Dick kaya nga iniutos ang ‘detention’ ni Guban sa Senado. Sa panlasa kasi ni Sen. Dick, “sinungaling” itong si Guban, aguy!

At talaga palang “matindi” ang homework na ginagawa ni Sen. Dick bago ang ano mang pagdinig ng kanyang komite, dear readers!

Dangan kasi, “nabulaga” niya si Guban at naibisto na itong “bata” ni PNP colonel, Eduardo ‘Jojo’ Acierto at PDEA deputy director, Ismael Fajardo sa loob ng BoC, ay isang ‘manipulator’ na kayang “ilaglag” ang isang “hamak” na ‘scavenger’ at ‘welder’ para naman “iligtas” itong ‘SMYD Trading.’

Mantakin ninyo, dear readers, kung “engot” na “imbestigador” itong si Sen. Dick, at “naniwala” sa mga dokumento at testimonya na nakuha ng kanyang komite, aba’y talagang “kawawa” itong nabanggit na scavenger/welder dahil siya ang makukulong sa kasong drug smuggling -- na “maniobra” din umano nitong si Guban at kanyang mga “kasabwat” sa PDEA, PNP at iba pang ahensiya ng gobyerno.

Sa pagdinig noong Miyerkules, nagkaroon naman ng kasama sa “selda” ng Senado itong si Guban matapos mapalabas din ni Sen. Dick na “kababaing tao,” “sinungaling” din itong si Marina dela Cruz Signapan, ang may-ari ng SMYD Trading -- na tinangka ni Guban na “iligtas” sa mga kaso at kontrobersiya.

Depensa ni Guban, ang kanyang aksyon na “idiin” ang isang inosenteng tao para lang “mailigtas” si Signapan sa “disgrasya” ay “utos” umano ni Col. Acierto, na kanyang ‘handler.’

Kung sa susunod na pagdinig, may iba pang opisyal na “inguso” si Guban, hindi na tayo dapat magtaka, dear readers. Ayon na rin kasi kay Sen. Dick, “detenido” si Guban “hanggang magsabi” na ito ng “totoo.”

At dahil hindi naman sila mga “tanga,” ilan sa mga ‘resource persons’ sa pagdinig noong Miyerkules ay “humingi” na ng isang ‘executive session’ kay Sen. Dick, KASAMA na itong si Guban na higit isang linggo nang hindi nakakauwi sa kanyang 3-palapag na bahay sa Cavite.

And take note, dear readers, noon ding Miyerkules, napansin natin na “nagpasaring” na si Sen. Dick sa mga opisyal ng PDEA at BoC na huwag nang “magtangka” na “paikutan” o “palundagin” din siya katulad nitong sina Guban at Signapan.

‘In so many words,’ kumbaga, Sen. Dick is conveying the message that, ‘Don’t you even dare, people,  I know a lot than what you think!’

Translation? “Subukan” din nilang “paglaruan si Sen. Dick at “siyento por siyento,” hindi lang ‘public humiliation,’ “kulungan” din ang babagsakan nila.

Aber, nang tanungin pa nga natin si Sen. Dick kung gagawin ba niya talaga ito, ang sagot niya sa atin, ‘You know me!’

Oo nga naman, eh di… go ahead, Senator You-Know-Me! Suportado ka ng publiko, hehehe!

Abangan!

Tagged Under