‘Palitan’ sa MTPB

September 18, 2018

“NAGKAPALITAN,” na pala, kasamang Non Alquitran, sa “liderato” ng “MTPB” -- Manila Traffic and Parking Business, ayy, ‘Bureau’ pala, hehehe!

At dahil sa isang “huntahan” lang natin nakuha, hindi kumpleto ang naibigay na pangalan sa atin nang “pumalit” (daw) kay “DA” (Dennis Alcoreza).

Sa kuwento sa atin, isang ‘Col. Valdez,’ na umano’y isang “retired officer” ng Phil. Army, ang “pumalit” dito kay DA, tama ba, Manila City Hall Press Club president, Doris Franche Borja?

Kung isang “katotohanan” o isang “panlilinlang” (na naman) ang pangyayaring ito sa minamahal na siyudad ni Boss Erap, “magmasid” muna tayo, hindi ba, Boss Joey Venancio?

Dangan kasi, kapatid na Itchie Cabayan, may “nang-uurot” sa atin na “moro-moro” lang ang nangyari dahil kahit alam naman natin na malinis siya sa kanyang katawan at sinasabi pa nga ng mga miron ay “araw-araw” naman siya kung “maligo,” hindi na raw kasi “mabango” itong si DA sa mga Manilenyo, ahahay!

At dahil ‘closely identified’ kay Boss Erap, baka “makaladkad” pa ang “Ama ng Masa” sa “balon ng eskandalo at kahihiyan” -- at “malasin” pa sa ‘tandem’ nitong sina ex-mayor Fred Lim at DSWD undersecretary, Isko Moreno, sa araw ng halalan.

Hmm. “Posible,” hindi ba, ‘Boss’ Alan Encarnacion?

Translation ng ating mga miron? Aber, kahit man lang sa ‘press release,’ “mapabalita” na “nagkapalitan” na nga sa liderato ng MTPB, ‘for the consumption of all the critics of DA,’ ganun ba ‘yun, kasamang Bambi Purisima?

Kuwidaw nga lang, bagaman “sa papel” ay ito na nga (daw) si Col. Valdez ang “hepe” ng MTPB, sa “totoong buhay,” ito pa rin umanong si DA ang “nagmamando” sa nasabing tanggapan, ayon pa rin sa mga miron.

At maari ngang “drowing” lang ang nangyari dahil nang ating tanungin, “tanong” din ang sagot sa atin ni Sen. Jinggoy.

“Sino ‘yun,” ang sagot sa atin ni Sen. Jinggoy nang tanungin natin kung “kilala” at “bata” niya itong si Col. Valdez?

Dangan kasi, “pinalulutang” sa City Hall na si Sen. Jinggoy -- na alam nang lahat ay “walang bilib” dito kay DA -- ang nasa “likod” ng umano’y nangyaring “pagbabago” sa MTPB, at “siya” ang “nagrekomenda” dito kay Col. Valdez.

Sa kanyang sagot, aba’y “nagkabistuhan” na, hindi ba, mga kabayan, kaya puwede ba, tigilan na ng mga kurimaw sa hanay ng mga “binuwenas” na pagtiwalaan ni Boss Erap, ang “pagdadawit” sa pangalan ni Sen. Jinggoy? Kumbaga, ‘style’ ninyo, “bulok” na, “panis” pa!

* * *

Sa ngalan naman ng “balanseng opinyon,” “tingnan” naman natin sa “punto-de-bista” na talagang ‘genuine’ ang nangyaring “pagbabago” sa MTPB at talagang gusto na ni Boss Erap na “mailagay sa ayos” ang trapiko sa Maynila sa tulong ni Col. Valdez, hindi ba, NPC director, Aya Yupangco?

Ang una nating panukala ay ipakita ang kanyang ‘seriousness’ sa pamamagitan ng “paglilinis” sa lugar ng ‘Plaza Lawton’ (Liwasang Bonifacio) at ‘Intramuros,’ partikular na sa kahabaan ng ‘Magallanes Drive.’

Para sa maayos na daloy ng trapiko at pagbabalik ng “dangal” ng mga nasabing lugar bilang mga ‘public parks’ at ‘tourist destination’ sa Maynila, alam nating hindi “papatulan” ni Col. Valdez ang sinasabing P1 milyon “kubransa” BAWAT LINGGO sa mga lugar na ‘yan.

At bilang dating opisyal ng ating Sandatahang Lakas, naniniwala rin tayo na “tablado” kay Col. Valdez ang umano’y P5-P8 milyon “parating” ‘each week’ ng mga “kolorum,” ‘illegal terminal’ at sandamakmak na mga ‘illegal vendors’ sa kahabaan ng Taft Avenue.

Kung kaya niyang tanggihan ang mga ito dahil nga ayaw niyang “madungisan” ang tiwala sa kanya ni Mayor Erap, aba’y kayang-kaya rin niyang tanggihan ang umano’y P50-P80 milyon “kubransa” sa buong Maynila KADA BUWAN, hindi ba, kasamang Marlon Purificacion?

At siyempre, ang isang magaling na lider, palaging may “malasakit” sa kanyang mga tauhan kaya alam nating nagbigay ng “pag-asa” ang kanyang pag-upo sa MTPB sa hanay ng mga ‘traffic enforcer.’

“Siguro naman, Sir Paul, ‘makakatikim’ na kami ng suweldo ngayon,” tanong naman sa atin ng mga traffic enforcer na nakausap natin.

“Tingnan” na lang natin, hindi ba, dear readers, kaya… abangan!

Tagged Under