‘Nagkabukulan’ kaya ‘nagkabistuhan?’

October 05, 2018

BAGO ang lahat, muli nating binabati ang pamunuan ng ‘Quezon City Police District Press Corps’ (QCPDPC) sa pangunguna ni Pres. Almar Danguilan, sa kanilang matagumpay na ‘induction’ kahapon sa harap ni National Press Club (NPC) president, Rolly ‘Lakay’ Gonzalo.

Ayon sa ating mga “kapatid” nalagay pa sa “peligro” ang masayang pagtitipon na ginanap sa ‘Kowloon Restaurant’ dahil sa bukod sa pagbati (at isang pirasong litson) wala nang ibinigay na suporta sa kanila ang tanggapan ni QCPD director, Chief Supt. Joselito Esquivel -- ‘the first time in the history of the QCPDPC oath taking’ anila pa.

‘But all is well that ends well, wika nga, kaya malaki ang pasasalamat nila sa iba pang mga personalidad at ahensiya sa “Kyusi” na “nagpuno” sa pagiging “makunat” ni DD Esquivel -- NCRPO director, Guillermo Eleazar, PCOO secretary, Martin Andanar, DENR Usec. Benny Antiporda, ang BJMP/QC District Jail at, ang inyong lingkod, bilang bise presidente ng NPC.

Muli, mabuhay ang QCPD Press Corps!

* * *

‘No bearing’ at ‘too late the hero’ ang nangyari kay Port of Zamboanga district collector, Atty. Lyceo C. Martinez, mga kabayan.
 

Noong Martes, matapos nilang “ibandera” sa media ni ESS Zamboanga district commander, Filomeno Salazar, na “nabawi” na nila ang 18,000 sako ng “nadugas” na 23,000 sako ng bigas sa Port of Zamboanga noong isang linggo, pareho na pala silang sinibak ni Comm. Sid Lapeña sa puwesto, aguy, aguy, aguy!

Sa ilalim ng ‘Customs Personnel Order’ (CPO) B-290-2018 at B-291-2018 na naging epektibo noon ding Martes, Oktubre 2, tanggal sina Martinez at Salazar sa puwesto, aruy!

‘No choice’ si Comm. Sid, dear readers, sa kanyang desisyon.

Ayon na rin kasi kay presidential spokesperson, Atty. Harry Roque, “nabuwisit” (‘upset’) mismo si PDU30 nang malaman na “naipuslit” sa tungki ng ilong ng BoC ang mga nasabing bigas na tinangka namang “ipuslit” mula sa Malaysia.

Ang kargamento ay nasabat naman ng militar at Phil. Coast Guard (PCG) at bilang ‘protocol’ ay inilipat naman ang pangangalaga sa BoC.

Ayon pa nga kay Roque, “inutusan” ni PDU30 si Comm. Sid na sibakin si Martinez at iba pang mga opisyales ng Port of Zamboanga, na posibleng sabit sa nasabing anomalya. Kasama rin sa gustong maimbestigahan ni Pang. Digong ang mga lokal na opisyales ng National Food Authority.

Sa ganang atin pa, dear readers, hindi ba mistulang karneng “botcha” (‘double dead’) ang nangyari dito, hehehe.

Mantakin ninyo, matapos “palusutin” (smuggled) mula sa Malaysia, “pinalusot” naman sa bakuran ng BoC hehehe!

At “mabuti” naman, naka-alerto ang ‘mainstream media’ kaya nabulgar ang nangyari kaya…mabuhay ang malayang pamamahayag!

* * *

Kung tama naman ang “timbre” sa atin ng ilang miron, “nagkabukulan” ang ilang mga opisyales sa mga ahensiya ng gobyerno na “nagbabantay” sa talamak na insidente ng ‘smuggling’ sa Mindanao, partikular sa Zamboanga Peninsula, kaya “nagkabistuhan,” tararan!

Anila pa, sa iniutos na imbestigasyon ni PDU30 sa insidente, dapat din umanong alamin kung “sino” itong opisyales umano ng BoC na may “tongpats” na P60 “per sako” ng bigas na “pinalulusot” sa lugar ng Mindanao na ang “bagsakan” naman ay d’yan sa Zamboanga.

Wala rin umanong “timbre” sa ilang mga operatiba ng PCG sa nasabing lugar na darating ang mga nasabing bigas lulan ng tatlong ‘motor launches’ kaya “nasabat” ng PCG, bagay na hindi nakapagtataka dahil “kabisado” na rin (siyempre) ng PCG ang “rota” ng mga smuggler sa karagatan ng Mindanao.
 
Ang ‘bottom line’ dito mga kabayan? Masyado pang “mahaba” at “malayo” ang “lalakbayin” ng kampanya ni Pang. Digong, Comm. Si Lapeña at iba pang mga katulad nilang lingkod-bayan laban sa korapsyon.

Subalit, katulad ng kampanya laban sa iligal na droga, hindi dapat “tantanan” ang paglaban sa katiwalian kaya, sige lang, Comm. Sid! Suportado ta ka!