‘Mabigat na hamon’ sa BoC

October 22, 2018

WALA kahapon sa ginawang pagdinig ng Senado sa badyet ng Department of Finance (DoF) si Bureau of Customs (BoC) commissioner, Isidro Lapeña, isa sa mga ‘line agencies’ ng DoF.

Ayon kay Customs OIC at AOCG (Assessment Operation Coordinating Group) deputy commissioner, Edward James Dy Buco na “nakahuntahan” natin, inaasahan nila na ngayong araw, Martes, “lulutang,” agh, ‘magre-report’ si Comm. Sid -- bilang ‘Customs commissioner,’ pa rin, hehehe!

At habang “nakabitin sa pananabik” ang sambayanan kung “magtatagumpay” na ang patuloy na kampanya upang patalsikin siya sa puwesto gamit ang isyu ng ‘shabu smuggling,’ ang hindi na “napapansin” ay ang “bumibigat” na “hamon” sa Aduana, kung pagkolekta ng buwis ang pag-uusapan.

Kumbaga, habang “nakatuon” ang pansin ng karamihan sa “pulitika ng personalidad” at pagsusulong ng ‘vested interest’ ng ilang grupo sa Aduana na “nakasandal” sa isyu ng shabu smuggling, ang “nakakalimutan” sa ‘agenda’ eh, paano epektibong matutugunan ng Aduana ang responsibilidad nito bilang ‘second biggest revenue generating agency’ ng kahit na sinong administrasyon.

Sa inilabas kasing ‘budget presentation summary’ ng DoF, napansin natin na sa pagtatapos ng administrasyong Duterte sa 2022, aabot sa halos ISANG TRILYONG PISO (P1 trillion) ang buwis na dapat makolekta ng BoC, susmariosep!

Pansinin, sa 2019, “aakyat” sa halos P644 bilyon (P643.9 bilyon), ang ‘assigned collection target’ ng BoC, na higit P100 bilyon kumpara sa kasalukuyang target na P584.9 bilyon.

Sa 2020, “inilagay” sa P749.2 bilyon ang ‘target’ ng BoC, P827.3 bilyon sa 2021 at, P916.1 bilyon sa 2022, ang huling taon ni PDU30 sa puwesto. Kumbaga, “ilang barya” na lang at isang trilyong piso na ang kailangang “malikom” ng BoC, ahahay!

Ang tanong natin, “paano” kaya matutugunan ng BoC ang “mabigat” na “hamong” ito samantalang “tinapyasan” pa ng 19 porsiyento ang panukalang badyet nito sa 2019, mula sa P3.231 bilyon, na ginawang P2.617 bilyon.

“Apektado” sa nangyaring “tapyasan blues” ang badyet ng BoC para sa pagbili ng mga bagong X-Ray machines at ang “nilumot na sa kasaysayan” na ‘Customs Academy.’

Ang “pakunsuwelo” na lang sa atin ni Depcomm. Dy Buco, “hihingi” sila ng ‘supplemental budget’ sa Senado para sa mga nabanggit na proyekto kaya ang sagot naman natin, eh, di…wow, ayy, good luck, hehehe!

‘Good luck’ na lang ang ating masasabi, dear readers, dahil hindi rin “maikakaila” na “apektado” ng kontrobersiya ng ‘shabu smuggling’ at nang panawagan ni PDEA Director Aaron Aquino na mag-resign na si Comm. Sid sa isyu ng ‘command responsibility’ ang ‘morale’ nitong “Lolo” ni BOCEA president, Remy Princesa.

Eh, paano nga ba “mag-iisip” ng mga bagong “estratehiya” si Comm. Sid upang una, “matupad” ang kanyang “pangako” na “makukuha” ang ‘target collection’ ngayong taon at ikalawa, ang ‘target collection’ sa 2019, kung ang oras niya ay “nauubos” sa “pag-iisip” kung paano “sasalagin” ang mga “upak” sa kanya ngayon?

At siyempre, ang “mas matinding tanong” na, “Magtatagal pa ba siya sa puwesto?”

Sa presentasyon kahapon ni DoF Secretary Carlos Dominguez, ‘full credit’ naman ang “ipinaligo” niya kay Comm. Sid dahil nga sa mataas na koleksyon ngayon ng Aduana sa buwis.

Batay sa datos, higit 35 porsiyento ang itinaaas ng ‘tax collection’ ng BoC, na ‘more than double’  sa itinaas ng koleksyon ng Bureau of Internal Revenue (BIR) na 13.5 porsiyento.

Mula sa P283.6 bilyon, ‘actual collection’ ng Aduana mula Enero hanggang Agosto 2017 (termino ni Comm. Nick Faeldon), halos P100 bilyon ang “itinaas” nito (P383.6 bilyon) nang maupo na si Comm. Sid sa poder.

Ayon pa nga kay Sec. Dominguez, ang lahat ay dahil sa “epektibong” ‘law enforcement’ at ‘anti-smuggling campaign’ ng Aduana.

Sakali naman na magtagumpay ang ‘Oust Lapeña Plot’ dear readers, marahil, isa lang din ang magiging “tanong” ni PDU30 at Sec. Dominguez sa sino mang nag-aambisyon na palitan siya sa puwesto:

“Kaya” ba nilang “tapatan” man lang ang mga nagawa ni Comm. Sid sa koleksyon ng buwis dahil nga sa katotohanan na “papalo” ito ng halos isang trilyong piso sa susunod na apat na taon?

Pansinin pa rin mga kabayan na sa “inilalako” ng DoF na ‘TRAIN 2’ sa ating mga mambabatas, “nakasalalay” din ito sa kakayahan ng BoC at BIR na makolekta ang mga halagang “nakatoka” sa kanila.

Isa lang sa dalawang ito ang “hindi” ‘mag-deliver,’ aba’y ‘made-derail’ ang TRAIN 2, eh, sigurado, “magagalit” si PDU30 ‘nyan, hehehe!

Sa ngayon, lumalakas ang panawagan ng mga “galit” kay Comm. Sid na “sibakin” na siya ni PDU30 hindi lang sa isyu ng ‘command responsibility’ bagkus, sa isyu rin ng ‘incompetence.’

Eh, sakali namang “sumalto” rin ang papalit sa kanya, ano ba ang magiging dahilan din ng mga susulpot na kritiko para alisin din ito sa puwesto, hindi ba ganyan din, ‘command responsibility’ at ‘incompetence?’

At paano kung ‘yung mga kritiko niya ngayon ang napalagay sa puwesto at “sumablay” din, eh, “matanggap” kaya nila na “lunukin” ang mga “dumi” na “ibinato” nila kay Comm. Sid, partikular na ang “bintang” na ‘incompetence,’ aber?

Kung mga senador naman ang tatanungin, hindi incompetent si Comm. Sid. ‘Yung mga “pinagtiwalaan” niya lang, kaya, sige, Comm. Sid, sibakin mo na lahat ang mga ‘yan, hehehe!

At hindi masama kung mag-usap kayo ng ‘heart-to-heart’ ni Atty. Lourdes ‘Dhess’ Mangoang, tama ba, dear readers?

Naniniwala tayo na “labs” pa rin (as in, mataas pa rin ang respeto) ni Atty. Dhess kay Comm. Sid at palaging nakahanda siyang tumulong para sa ikabubuti ng Aduana.

Ang problema nga lang, “inintriga” at tinangka pa siyang “gibain” at “takutin” ng mga “kurimaw” na “nakabakod” pa rin kay Comm. Sid, eh, ‘wrong move’ sa ganang atin, dear readers.

Dangan kasi, ‘kapos” naman pala sila sa “bala” “gagalitin” pa nila si atorni na kilala nating malambing, mabait -- pero, “palaban!”

Ayun, nang “gumanti” ng “putok,” “natameme” at “umiskiyerda” na silang lahat, hahaha!